AKP’iyên ku li Wanê dest danîne ser şaredariyên HDP’î karên wan ên nelirê naqede. Piştî ku Bûrhan Kayaturk careke din ji AKP’ê bû parlamenter, bi destûra Şaredariya Tûşba ya AKP’yî fîrma înşaetê ya biraziyên Kayaturk Bayram Kayaturk kete nava liv û tevgerê.
AKP’iyên ku çav berdane parka li sîsteya Pîşesaziyê û dixwazin erdê 382 kesan bikirin, soza ‘Em ê ji we re dikanan çêbikin’ dan esnafan. Li ser vê yekê esnafan serî li dadgehê dan û kirin ku biryara rawestandinê bê wergirtin. Lê belê li gel biryara 5’emîn Dadgeha Esliye ya Wanê jî Alîkarê Şaredarê Tûşba yê AKP’yî ji rayedarên fîrmayê re got, ‘Hûn avakirinê dewam bikin, dadgeh ne girîng e’ û destûr da ku li qadê karê înşaetê bê kirin. Rayedarên şaredariyê ku bi zabitayan hatin qadê, di bin navê lihevkirinê de bi dikandaran re civîn lidar xistin. Esnafan pêşniyara wan qebûl nekirin.
AKP’iyên ku dest danîne ser park û erdê esnafan, ji bo li nava parkê dikanan çêbikin dest bi kar kirin. AKP’yî herî dawî ji parlamenterê AKP’î Bûrhan Kayaturk alîkarî xwestin. Kayaturk jî xwest ku karê dane destpêkirin tavilê bibin serî.
Li ser vê yekê dikandarên pîşesaziyê serî li dadgehê dan û xwestin ku biryara rawestandina vî karî bi cih bê anîn. Dikandar li benda biryara dadgehê ne.
