Îqtîdarê AKP-MHPyî yo ke weçînayîşanê peyênan de Kurdîstan de nêeşka hedefê xo bivisno destî, bi kampanyaya ‘Serra 100. de 100 şaristanî, 100 qezayî’ wazeno merkezanê kurdan parçe bikero û bi nê hawayî netîce bivisno destî.
AKP-MHP wazeno qezayanê Cizîra Botan, Erdîş, Sêwrege, Gever û Mîdyadî bikero şaristanî. AKP Wan de her weçînayîşan de bin kewt. AKP-MHP plan keno ke Erdîş bikero şaristanî, qezayanê Ekex û Bêgirî ci rê girê bido û bi nê hawayî potansîyelê xo yê rayan ê Wanî parçe bikero.
Colemêrg de AKP-MHP wazeno qezaya Geverî bikero şaristanî ke Gever kelayanê têkoşînê kurdan ra yew o. Yeno waştene ke Elbak zî Geverî rê bêro girêdayene. Merkezanê tewr girîngan ê têkoşînê kurdan ra yew zî qezaya Cizîra Botanî ya Şirnexî ya. Rejîmê AKP-MHPyî wazeno Cizîra Botanî zî bikero şaristanî û bivurno baregehêkê leşkerî.
Serqoricî Sedat Bucak bi serran o pê qezaya Sêwrege ya Riha bilbîyaye yo. AKP-MHP wazeno Sêwrege bikero şaristanî û bi nê hawayî xelate bido Bucakî. Sewrêge qezayêka winayên a ke tede hûmara qoricîyan zafêr a. Qezaya Mîdyadî ya Mêrdînî de AKP exlebî weçînayîşan de ser keweno. AKP wazeno Mîdyadî bikero şaristan û bi nê hawayî ey bikero merkezê AKPyî.
Hemserekê HDPyî yê Wanî Fîkret Doganî vist vîrî ke verê cû zî xeylêk herêmê Kurdîstanî ameyê kerdene şaristanî û vat: “Eke Gever bibo şaristanî hînî tede leşker û polîsî hîna zaf do bêrê cakerdene. AKP keno ke herêmê HDPyî bikerê qels. Ma Erdîş de, Gever de bihêz ê. AKP nînan ser o planan keno.”
Planê dewlete neteweperestî yê
Wekîlê Partîya Çep a Keske yê Wanî Sînan Çîftyurekî pare kerd ke AKP çarçewa weçînayîşan û rantî de wazeno qezayan bikero şaristanî û vat: “Planê dewlete neteweperestî yê. Sîyasetê zereyî û teberî de 100 serrî yo vera kurdan têgêrena. Meseleya kurdan de hesabê serê şaristankerdişê qezayan do fayde nêkerê. Qezayî seba ke tede leşker û polîsî bizêdîyê do bêrê kerdene şaristanî.” WAN
