Endamê Komîteya Zîndanan a PKKyî Pîro Dêrsimî derheqê rewşa zîndanan û tecrîdê vera Rayberê Şarê Kurdî Abdullah Ocalanî de ANFyî rê qisey kerd.
Qiseykerdişê Dêrsimî ra tay noqtayê girîngî wina yê:
”Seba ke weçînayîşê 14-28ê gulane meşrû nêbîyê, netîceyê ci zî meşrû nîyê. AKP-MHP-HUDA PARî pê hîleyan nê weçînayîşî vistî destî û îradeyê şarî xesp kerd. Îqtîdarê AKP-MHPyî cara 2015î ra nata çarçewa Planê Çokdayîşî de vera têgêrayîşê azadîye, şarê ma, tepişteyan û muxalîfan hêriş keno. Xora Îqtîdarê AKP-MHPyî seba ke têgêrayîşê azadîye tasfîye bikero hetê hêzanê mîyanneteweyîyan ra ameyo erkdarkerdene. Nika ma reyna kewtî prosesêkê giranî. Aseno ke hêrişê îqtîdarî do bizêdîyê. La ma eşkenê bi rêxistinbîyayîş û xoverdayîşî verê hêrişan bigêrê. AKP-MHP nika keno ke bi kurdanê xayînan ê sey HUDA-PAR û PDKyî kurdan bixapîno. Eşkera yo hêrişê vera Rojawanî zî do bizêdîyê.
Seba ke zîndanan de rêxistinîya PKKyî xurt a, dişmenî tim hêrişê zîndanan û embazanê ma yê tepişteyan kerd. Dewlete seba ke pê xoverdayîşê embazanê ma nêeşka hucreyê yewkesî ferz kerdî. Nê zîndanê bi nameyê Tîpê Syî û Bi Asayîşê Berzî warê tecrîd û îzolasyonî yê û tede faşîzm lewe de yo. Bi nê zîndanan pêro heqê tepişteyan yenê binpaykerdene û dewlete nameyê ‘Bernameyê Weşkerdişî’ nayo pa. Kadro û wezîfedarê nê zîndanan zî ê îqtîdarê faşîstî yê.
Embazê ma zafêr nê zîndananê Tîpê Syî û Bi Asayîşê Berzî de tepişîyenê. PKK wayîrê xoverdayîşê zîndanan ê 45 serrî yo. Nê prosesî de zî embazê ma zîndanan de mîyanê xoverdayîşî de yê. Eke ma wazenê nê xoverdayîş û têkoşînî de ser bikewê ganî xora xoverdayîşê Îmraliyî yê Rayber Apoyî esas bigêrê. Rayber Apo 25 serrî yo binê tecrîdêkê giranî de yo la qetî nê tecrîdî ra semed lome nêkerd. Eqsê ci ey zîndan de binê tecrîdî de projeyê xo û paradîgmaya xo awan kerde. Ma ney rê vanê ‘Xoverdayîşo Manewî.’ Embazê ma yê tepişteyî ganî serkêşîya Xoverdayîşê Îmraliyî de bi hawayêkê rêxistinkerde têbigêrê û hêrişanê dişmenî pûç bikerê.
Ewro embazê ma yê tepişteyî reyna zîndanan de astêka tewr berze de xo ver danê. Coka ganî sere de keyeyê tepişteyan û rêxistinê huqûqî pêro şarê ma û dezgehê ma têkoşînê vera tecrîdî xo rê bikerê erkê verênî û xoverdayîşê tepişteyan pîlêr bikerê. Dişmen keno ke tecrîdê Îmraliyî pêro zîndanan ra vila bikero. Ganî her kes, her dezgeh û rêxistine vera na kerdene têbigêro. Ma venga pêro kesan danê ke vera tecrîdê Îmraliyî mîyanê xoverdayîşêkê aktîfî de cabigêrê û dormeyê xoverdayîşî de yew bibê.” BEHDÎNAN
