Komîteyê, li ser meş û mîtîngê ku wê bi boneya salvegera sedemîn a Peymana Lozanê li dar bên xistin, bi nivîskî daxuyanî da. Mîtîng, wê 22’yê tîrmehê saet di 11.30’an de li ‘’Place de la Navîgatîon’’ê li dar bikeve.
Bi daxuyaniyê ev tişt hatin diyarkirin: ‘’Sed sal bi ser Peymana Lozana ket. Encamên peymanê ji bo kurd û Kurdistanê, dabeşbûna Kurdistanê, qetlîam, înkar û koçberî û nenaskirina hebûna kurdan e. Bi îmzekirina Peymana Lozanê re, mekanîzmaya mêtingeriyê di ser gelê kurd re hatiye rewakirin.
Kurdan ev peyman bi tu awayî qebûl nekiriye û wê neke.
Gelê Kurdistanê, di salvegera sedemîn a peymanê de bi lidarxistina meş û mîtîngan dixwaze vîna xwe ya çareseriyê, nasname û hebûna xwe nîşanê cîhanê bide.
Me bang li kurdan, Kurdistaniyan û dostên wan ew e ku tev li meşa dîrokî bibin ku wê 22’yê tîrmeha 2023’yan ji bo ragihandina nasname û vîna Kurdan bê lidarxistin.
Tevlibûna we erkeke neteweyî ye, xwedîderketina li şan û şerefa xwe ye. Hêviya me ew e ku her kurd û kurdistanî tev li meş û mîtîngê bibin!’’
