Komîteya Kar û Çalakiyên 100 saliya Peymana Lozanê bi daxuyaniyek nivîskî ragihand ku wê di çaroveya 100 saliya Peymana Lozanê de bi tevlîbûna nûnerên partî, rêxistin, sazî û kesayetên Kurdistanî di 22-23’yê tîrmehê de roja Şemî û Yekşemê civînekê li dar bixin.
Komîteya Kar û Çalakiyên 100 saliya Peymana Lozanê di daxuyaniya xwe de wiha got:
“Weke tê zanîn berê sed salan li Lozanê ku bajarekê Swîsreyê ye, konferanseke navneteweyî-navdewletî hat lidarxistin û di encamê da peymanek hate mohrkirin û Kurdistan careke din hate parçe kirin.
Em nûnerên partî, rêxistin û sazîyan û kesayetên Kurdistanî, 22-23’yê tîrmeha sala 2023’yan rojên Şemiyê û Yekşemê, di salvegera 100’emîn a Peymana Lozanê de, li Lozanê kom dibin. Em ê di civînê de nirxandina encamên Peymana Lozanê bikin û helwesta xwe diyar bikin.
Em dixwazin di salvegera 100’emîn a vê peymana reş de, helwesteke Kurdistanî derbixin holê û nerazîbûna xwe ji aliyan re bidin der û dengê xwe bigihînin dinyayê. Roja 24’ê Tîrmeha sala 2023’yan salvegera mohrkirina Peymana Lozanê ye, li ber salona gotûbêj tê de hatiye kirin, em ê bi daxuyaniyeke girseyî encamên konferansê ragihînin raya giştî ya cihanê.
Ji çar aliyên Kurdistanê û dîasporaya kurd wê kes li Lozanê kom bibin û bi yek dengekê bilind bang li wijdanê mirovahiyê û hemû dewletên dinyayê bikin û bibêjin: “Di salvegera 100’emîn a Peymana Lozanê de, em kurd û Kurdistanî li Lozanê ne û Peymana Lozanê red dikin.”
