Parlamenterê Partiya Çepên Kesk ê Colemêrgê Vezîr Coşkun Parlak ji ANF’ê re axivî û bi bîr xist ku piştî hilbijartinan him Desteya Rêveber a Navendî ya HDP’ê û hem jî ya Partiya Çepên Kesk nirxandinên berfireh kirin. Parlak diyar kir bi Meclîsa Partiyê, hevserokên bajaran, hevberdevk, rêxistiên navçeyan ên her du partiyan tevî pêkhateyên Tifaqa Ked û Azadiyê pêvajoyê dinirxînin û got “Niha wê di civînên gel ên li Bakurê Kurdistanê û Tirkiyeyê yên di navbera 15-25’ê Tebaxê de nirxandin bên kirin û pêşniyar û rexne bên guhdarîkirin û wê di konferansên rêxistinkirinê de gavên nû yên avakirinê bên avêtin. Ez dixwazim vî tiştî diyar bikim, ji bo me nirxandin û pêşniyazên herî hêja, yên di civînên gel de ne. Piştî ku ev hemû pêvajoyên nirxandinê bi dawî bûn wê partiya me di meha Îlonê de biçe kongreya xwe û desteyên xwe yên nû diyar bike.”
Parlak, da zanîn ku hêj biryar nehatiye girtin lê dema Partiya Çepên Kesk biçe kongreyê wê di bername û rêziknameyê de hin guhertin çêbibin û got “Dibe ku navê partiyê jî yek ji van guhertinan be. Komîteyên me li ser vê mijarê xebatên xwe didomînin. Ji niha û pê ve em ê bi partiyekê bidomînin, ne bi du partiyan. HDP partiyeke ku di qonaxeke dîrokî ya gelekî girîng de hatiye avakirin û beşên mezin ên gel piştgirî dane wê. Bêyî ku ev kombûn û mîrate ji holê rabe, em ê formulek pêş bixin da ku em kêşeyên qanûnî yên li pêşiya xwe, karibin derbas bikin.”
Parlak bal kişand ser daxwaza gel a ji bo polîtîkayên giştî bi gel re bên diyarkirin û wiha got: “Kevneşopiya me ya siyasî jixwe bi gel re hemû biryaran digirin, partiyên me bi destê gelê me hatine avakirin û bi gel re mezin bûne. Di van demên dawî de rexne tên ku partî û gel ji hev dûr ketine. Em bi girîngî li ser van rexneyan disekinin û em ê ji bo vî tiştî mekanîzmayên xurt ava bikin.”
