Komîteya çalakî û aktîvîteyan a serra 100. ya Peymana Lozanî 22-23yê temmuze de şaristanê Lozanî yê Swîsre de bi şîarê ‘Serra 100. ya Peymana Lozanî de ma sey sey kurdan û kurdîstanijan Lozan de yê û ma Peymana Lozanî qebul nêkenê!’ konferansêk serûber bikera.
Roja verêne do rayraşîyayo merkezî û mîtîng bêrê kerdene. Konferans do 2 rojan dewam bikero. Netîcenameyê konferansî zî do 24ê temmuze de serrgêra peymane de bêro eşkerakerdene.
Komîte amadekarîyê xo qedînayî û dîyar kerd ke 4 parçeyanê Kurdîstanî ra tewr tay 600 kesî beşdarê konferansî do bibê.
Endamê Komîteya Lozanî û Endamê Konseya Rayberdişî ya KCKyî Zubeyîr Aydarî pare kerd ke do bi konferans û mîtîngê fînalî merasîmî bêrê kerdene û vat: ”Sebebê dejanê 100 serran na peyman a. Coka ma vanê na peymane qebul nêkenê. Amadekarîyê konferansî qedîyayî. 100 serrî verî dewletê mîyanneteweyî kom bîyî la tede temsîlkarê kurdan çin bîyî. Tirkan nameyê ma ser o qisey kerdbi û xo sey temsîlkaranê kurdan mojnabi.
Avusturya, Belçîka, Hollanda, Almanya û Fransa ra bi seyan otobusî do bêrê. Teberî ra ganî her kes bi îmkananê xo bêrê. Hetê bînî ra 24ê temmuza 1923yî de ma do bînaya Chateaû d’Oûchy ya Gola Lemanî de eşkerayîyêka girseyî reyde netîcenameyê konferansî eşkera bikerê.”
Bernameyê konferansî
Goreyê bernameyê komîte roja yewine ya konferansî Salle de Congres de Beaulieu de bêra kerdene, sînevîzyon tede bêro mojnayene û beşdarî do qisey bikerê.
Panelê yewinî de ‘netîceyê Peymana Lozanî û netîceyê ci yê serê Kurdîstanî’ do bêrê nîqaşkerdene. Selma Irmak û Xelîl Xezerî do moderatorîya panelî bikerê.
Roja diyînî ya konferansî de zî do di roniştişî bêrê kerdene. Kurdê Omer û Sehere Aydar do moderatorîye bikerê.
Roniştişê diyînî de zî ‘Rewşa şarê armenî, asûrî û keldanî’ do bêra nîqaşkerdene.
Roniştişê peyênî de zî bi moderatorîya Behrê Mohamed Mehmod û Rojan Hazim babeta ‘Vera netîceyanê Peymana Lozanî têkoşînê 100 serran’ do bêra ercnayene.
Beşê netîce de zî do ‘bira konferansî û netîcename’ bêrê eşkerakerdene. 24ê temmuze de roja dişemeyî, saete 10.00 de verê bînaya Chateau d’Ouchyî de netîcenameyê konferansî bi eşkerayîyêka çapemenîye bêro eşkerakerdene. LOZAN
