Endamê Konseya Rayberdişî ya KCKyî Mustafa Karasuyî programê taybetî yê Medya Haber TVyî de rojdem ercna. Qiseykerdişê Karasuyî ra qismêk wina yo:
”Polîtîkaya tecrîdî ya serê Rayberê Apoyî, polîtîkaya qirkerdişî yê vera kurdan a.25 serrî yo serê Rayber Apoyî de tecrîdo giran est o. No caardişê polîtîkaya qirkerdişî ya vera krudan o. Hêrişê vera têkoşînê şarêkî verî vera rayberîya ci û rêxistina ci ya sîyasîyî yeno kerdene. Heta ke nê tesfîye mebê têkoşînê şarî tesfîye nêbeno. Xora Xoverdayîşê Şêx Seîd û Dêrsimî de zî verî rayberîyî ameyî qetilkerdene. Coka heta ke vera tecrîdî têkoşîn mero kerdene û vera qirkerdişê kurdan têkoşîn nêbeno. Kurdî ganî na raştîye bivînê. Rojawan û Ewropa de şar wayîrê ci vejîyeno la ganî Başûr û Vakur de şar dahîna zaf wayîrê Rayberîya xo bivejîyo. Ganî heme kurdî vera tecrîdê serê Rayber Apoyî têkoşîn bikerê.
Serrgêra Lozanî de hêrişê îşxalî yo gird dîya destpêkerdene. Wazenê Zap, Metîna û Avaşînî îşxal bikerê. 2015 de zî serrgêra Lozanî de hêrişî dest pêkerdbi. Dewleta tirke rojanê sembolîkan ra hes kena. Bi nê hêrişan wazenê vajî ê do qirkerdişê vera kurdan temam bikerê. No semedê pêrune vîyartbar o. Semedê PDK, YNK, Rojawan û Rojhelat zî vîyartbar o. No têna hêrişê vera kurdanê Vakurî nîyo. Lozan pêkerdişê qirkerdişê kurdan o. Xora vera nê têkoşîno tarîxî yeno dayene. Dewleta tirke rixmo ke 2021î ra nata bi heme îmkananê xo hêriş kena, nêeşkena netîce bifîno dest.
NATO zî hemparê nê hêrişan o. Dewleta tirke hêrişê vera kurdan sey vera terorî name kena û bi tekîlîya xo ya bi PDKyî polîtîkaya qirkerdişê kurdan nimnena. Nika waranê ke hêzê PDKyî tede est ê, ûca ra hêrişî benê. PDK cayê gerîlayan teng keno, tekîlîya mabênê waranê gerlîyan birneno. Verê hetkarîya gerîlayan geno. La Tirkîya ra her çî serbest o. Tîya her çî gerîlayan rê qedexe yo la leşkeranê tirkan rê serbest o. Xora di reyê Xelîfan de embazî dîyayî xapî ro, ameyî qetilkerdene. Dewleta tirke bi hetkarîya PDKyî hêriş kena. Ganî na raştîye bêro vînayene û vera nê her kes tewirê xo ramojno. Dewleta tirke wazena ke gerîlayan biqedino ke bieşko kurdan qir bikero. Coka ganî heme kurdî, roşnvîr, partîyê sîyasîyî vera hêrişan tewir bigêrê.
Nika polîtîkaya şerê taybetî ya tewr bingêyîye ya ke dewleta tirke vera kurdan rayra bena polîtîkaya ajankerdişî ya. Şarî rê zext kenê ke wa ajanîye bikero. Na dişmenîya tewr pîl a, dişmenîya vera kurdan a. Başûr de tay welatperweranê ma ke ajanîye qebul nêkerd ameyî qetilkerdene. Nê hetî ra ganî heme kurdî hîsgêr bê. Ajanîya ra wetêr yew xirabîye çîn a. Naye ra wetêr bêehlaqîye çîn a. Keso ke beno ajan merdimo tewr xirab ê dinya yo. Kesêko ajanîye qebul keno senî ke bimiro. Keso ke ajanîye keno beno dişmenê wayûbirayê xo, dişmenê domananê xo. Ganî Kurdîstan de ajanîye bêro mehkumkerdene.
Konferansê Lozanî de qala yewîya neteweyîye ameye kerdene. La gama ke ma qala yewîya neteweyîye kenê ganî ma raştîyan bivînê. Ganî rewşa PDKyî bêro vînayene. Çunke yewîye rê beno asteng. Çew vanê qey PDK çînêbo yewîya neteweyîye nêbena. Xora ganî o zî tede cayê xo bîgêro la nîno. O yewîya neteweyîye nêwezeno. Wazeno ke serê heme netew û hêzanê sîyasîyan de hekîm bo. 2012-2013 de gama ke ma Tirkîya rê adirbirnayîş îlan kerd, şer vindert. O wext PDKyî yewîya neteweyîye waşte la wexto ke Tirkîya vera şer da destpêkerdene, cade peyser ancîya. Nê hetî ra yewîya neteweyîye muhîm a. Ganî heme grûb û partîyê kurdan bêrê têhet. La PDK heta ke hakîmîyetê xo medo qebulkerdene tewrê yewîya neteweyîye nêbeno. Heme kurdî yewîya neteweyîye wazenê têna PDK verê ci de asteng o.” BEHDÎNAN
