Festîvala Kultur û Xoza ya Munzurî ya 21. ya ke bi şîarê ‘Vera talanê madenan ma xoza û cuye pawenê’ ameye kerdene, bi konseran Meydanê Seyîd Rizayî de qedîyaye.
Destpêk de hunermend Hasan Alî vejîya sehne ser. Alîyî deyîra ke seba şerwanêkê gimgimijî yê şehîdî nuşta vate. Alîyî bi wesîleya serrgêra wefatê Aram Tîgranî zî deyîra ey ‘Ay Dilberê’ vate û girseyî zî ey reyde deyîre vate.
Dima Koma Munzurî vejîyaye sehne ser. Koma Munzurî vera qedexeyê serê Koma İsyan Ateşi û Yorumî nêrazîbîyayîşê xo mojna. Koma Munzurî girseyî reyde deyîrê xoverdayîşî vatî. Girseyî ê helî vera sloganê ‘Dêrsim do bibo goristanê faşîzmî’ vat.
Dima Yilmaz Çelîk û Apolas Lermî vejîyayî sehne ser.
Apolas Lermî û Mîkaîl Aslanî dima pîya deyîra bi kirdkî vate. Mîkaîl Aslanî konser de qisey kerd û vat: ”Êyê ke mabênê şaran de pirdê heskerdişî awan kenê do tarîx de cayê xo bigêrê. Êyê ke mabênê şaran de dişmenîye kenê do tarîx de vînî bibê.”
Aslanî ra dima zî Pervîne Chakar sehne de deyîra Arixî vate. Qiseykerdişan ra dima zî festîvale bi deyîranê Zeynepe Bakşî qedîyaye. DÊRSIM
