Komîteya Tenduristiyê ya Meclisa Sivîl a Reqayê bi hevkariya Desteya Tenduristiyê ya Bakur û Rojhilatê Sûriyeyê 14′ê sibatê dest bi avakirina karegeha oksîjenê kiribû. Li gorî agahiyên komîteya tenduristiyê da kargeh wê di çend rojên pêş de temam bibe. Kargeha ku dîroka vekirina wê hîn nehatiye diyarkirin, wê valahiyeke di qada tenduristiyê de dagire.
Li gorî komîteyê, kargeh wê rojê 80 metrekab berhemd bide. Komîte hewl dide ku oksîjenê bêpere pêşkêşî qada tenduristiyê bike. Ji bo sektora taybet jî wê bi buhayekî sembolîk bê pêşkêşkirin.
Têkildarî mekanîzmeya xebatê, cîgirê hevserokatiya Komîteya Tenduristî ya Reqayê Elî Ebdulezîz got: “Wê li kargehê kadroyên pispor werin erkdarkirin. Piştre dê dest bi ceribandinê were kirin û piştî demekê jî xizmet were pêşkêşkirin.”
Kargeha li Reqayê ya yekemîn, li Bakûr û Rojhilatê Suriyeyê jî ya sêyemîn e. Beriya niha li herêma Sibe Kêlo ya Dêrazorê û herêma Cizîrê kargeh hatibûn vekirin.
