Di daxuyaniya nivîskî ya Konseya Kurd a Demokratîk a Fransayê (CDK-F) û Tevgera Jinên Kurd a Fransayê (TJK-F) de, wiha hatiye gotin: “Li dijî têkoşîna mafdar a gelê kurd ku bi pêşengtiya zarokên xwe yên leheng pêk tîne, xeta îxanetê ya ku dewleta tirk bi destê hevkaran pêk tîne bi navê PDK-Barzanî bûye hevwate. Di sedsaliya Lozanê de faşîzma AKP-MHP’ê ku bi armanc û xeyalên sala 2023’yan ket rê, rastî berxwedana gerîla ya dîrokî hatiye û têk çûye. Dewleta tirk a ku ketiye nava qeyranek mezin de, PDK û Malbata Barzanî yên xayîn ji bo rizgarkirinê diçin hewara wan. Gerîla rûmeta gelan û temînata siberojê ye, em ê destûr nedin tu hêz bi rûmet û siberoja me bilîzin û em ê bêdeng nemînin.
Dewleta tirk hêza NATO’yê da pişta xwe û bi rûyê modernîteya kapîtalîst yê herî hovane êrîşê gerîla kir. Ev nîşaneya neçarî û bêhêziya dewletat tirk e. Ji ber vê yekê jî li başûrê Kurdistanê piştgiriyê ji PDK-Barzanî digire û xeta îxanetê her roj bi pratîkên cudatir berdewam e.”
Di daxuyaniyê de hatiye diyarkirin ku PDK-Barzanî li şûna azadî, pêşengiya jinan û berxwedanê, radestbûn, feodalîzm û îxanet tercîh kirine.”
Di dewama daxuyaniyê de ev tişt hatine diyarkirin: “Lê belê gerîla û Tevgera Azadiyê bi ruhê fedaî yê Apoyî, bêyî li berjewendiyên xwe bifikirin, di bin şert û mercên herî dijwar de, li têkoşîna mafdar a gelê kurd di berdêla dayîna canê xwe dewam dikin.
Em PDK-Barzanî ku li dijî gerîla û yekitiya neteweyî ya kurdan tevdigere û li xeta îxanetê dewam dike şermezar û lanet dikin. Em bang li gelê başûrê Kurdistanê dikin ku li dijî xeta îxanetê ya PDK-Barzanî ku hewl dide wan bike kole û bike xizmetkarê komara tirk a dagirker derkevin û xwedî li berdêlên ku ji bo azadiyê hatine dayîn derkevin û di çerçoveya yekîtiya neteweyî de tevbigerin. Eger ne wisa be wê faşîzma tirk- AKP-MHP’ê qirkirinên ji yên Seddam xirabtir pêk bîne.”
