Çavkaniyek siyasî ku nexwest navê wî were eşkerekirin, ji Rojnews re got, wezîrê derve yê Tirkiye, serokwezîr û berpirsên din ên Iraqê civiyan. Di civînê de berpirsên Iraqê daxwaza vekişîna hêzên Tirkiye ji nav Iraqê kirin û xwestin êrişên Tirkiye li ser serweriya Iraqê dubare nebin.
Heman çavkaniyê eşkere kir ku di civînê de rayedarên Iraqê mercên dewleta tirk ên ji bo ji nûde destpêkirina hinartina nefta Herêma Kurdistan a ji bo Bendera Ceyhanê red kirin. Her wiha rayedarên Iraqê xwestin ku Tirkiye 1 milyar û 500 milyon dolar wek tazmînat bide Iraqê.
Şirovekarê Siyasî Casim Musewî jî derbarê serdana Hakan Fîdan de ji Rojnews re axivî û got: “Dibe Hakan Fîdan bêhêvî vegere Tirkiyeyê. Ji berku hikûmeta Iraqê mercên Tirkiye yên ji bo çareserkirina pirsgirêka hinardekirina nefta Herêma Kurdistanê ya ji bo Tirkiyeyê red kir. Her wiha Bexda daxwaza vekişîna hêzên Tirkiye û berdana para Iraqê ya avê ji Enqere yê kir.”
Musewî diyarkir ku Tirkiye daxwaz ji Iraqê kiriye ku doza xwe ya li Dadgeha Navdewletî ya li Parîsê ku têde Tirkiye mehkum kiriye daku 1 milyar 500 milyon dolar wek tazmînat bide Iraqê bi paş de bikşîne. Lê hikûmeta Iraqê vê daxwaza Tirkiye red kiriye.
Di dawiyê de jî Casim Musewî destnîşankir ku Hakan Fîdan tişta ku dixwest bi vê serdanê bidest bêxe, ji aliyê Iraqê ve hat redkirin. Îro Hakan Fîdan wê li Hewlêrê li gel her sê Barzaniyan (Mesûd, Nêçîr û Mesrur) bicive.
