Hemserekîya Konseya Rayberdişî ya KCKyî derheqê hêrişê çekdarî yê vera Temsîlkarîya KNKyî ya Hewlêrî de eşkerayîyêke daye.
Eşkerayîye wina ya:
”Seke rayaumûmîye zî zanena dewleta tirke hêrişê xo zêdînayî. Tewr peyên Silêmanî û Hewlêr de hêrişî ameyî kerdene, di rojan verî zî Rojawan û Şingal de hêrişî ameyî kerdene. Netîceya nê hêrişan de şehadetî qewimîyayî. Hetê bînî ra dewleta tirke bê mabên hêrişê gerîlayan û têgêrayîşê ma kena. Ma pêro şehîdanê nê hêrişan yad kenê. Şarê Kurdîstanî yo welatperwer qetî do dişmen û xayînan ra hesabê nînan biperso.
Heyf ke nê hêrişan de giştê îxanetî est ê. Netîceya nê hêrişanê xayînan de şehadetî bîyî. Têkilîya Barzanîyan ê bi dewleta tirke îxanetêko eşkera yo û nê hêriş û şehadetî zî ney ra yê. Eke vera nê îxanetî tewir nêro mojnayene hînî na dafika îxanetî do cabiba. Na dafika dewleta tirke ya ke seba qedînayîşê kurdayetî ronaya. Êyê ke dewleta tirke û AKP-MHPyî reyde têgêrenê zî hemkarê nê planî yê. Rixmo ke têkilîya Barzanîyan a bi dewleta tirke hemkarî û îxanet a na rewşe bi zelalî nêna vatene û tewiro hewce nêno mojnayene. Bi nê hawayî şarî zî vera ney nêrazîbîyayîşêko xurt nêmojna.
Dima ke Hakan Fîdanî Iraq û Başûr de pêvînayîşî kerdî hêrişî zêdîyayî. Serebûtê Biradostî zî mojnenê ke plan yeno kerdene ke wa dewleta Iraqî zî tewrê ney biba. Biradost de yeno kerdene ke gerîlayî uca biteriknê. Oyo ke Kerkûk de qewimîyeno zî parçeyê nê planî yo. Dûştê îdîayanê Barzanîyan plan xelisnayîşê Kerkûkî nîyo la teslîmkerdişê Kerkûkî yo. No plan zî aîdê dewleta tirke yo. Dewleta tirke plan kena ke pêro Başûrî îşxal bikera.
Barzanîyî bi temamî angayeyê sîyasetê dewleta tirke bîyê. Ganî na raştîye hetê pêro kurdan ra bêra dîyene. Barzanîyî qetî seba Kurdîstanî tênêgêrenê. Teyna çend şaristanê Kurdîstanî binê kontrolê înan de bibê û nê cayan seba menfaetanê xo bişuxilnê nînan rê bes o. Seba nînan Kurdîstan hacetêkê bazarîye yo. Eke derdê înan Kurdîstan bîyêne verar şîyêne Hakan Fîdanî?Hakan Fîdan kiştox o. Barzanîyî kiştoxêkê winayênî de benê hemhal û raştîya xo eşkera kenê. Seba ke heta nika vera nê îxanetî nêrazîbîyayîşo xurt nêame mojnayene hende şehadetî qewimîyayî. Na rewşe çêrîye daye îxanetî.
Hêrişê vera buroyê KNKyî yê Hewlêrî de Temsîlkarê KNKyî embaz Denîz Cevdet Bulbul şehîd bi. KNK seba yewîya kurdan xîret keno. KNKyî wextê peyênî de karê girîngî kerdî. Tewr peyên zî Lozan de Peymana Lozanî ser o konferansêko girîng serûber kerd. Labelê Barzanîyî tewrê nê konferansî nêbîyî. Çunke derdê înan kurdayetîye nîyo. Barzanîyî pê pratîkanê xo derdê xo eşkera kenê. Ganî her kes bi hawayêkê zelalî ney bîyaro ziwan. Ma neçare yê ke îxanetî rê vajê îxanet û vera îxanetî tewir bimojnê. Bi nê hawayî ma do bieşkê yewîya kurdan awan bikerê.
Hêrişê vera Meydanê Teyarayan ê Silêmanî de ma hema zî wayîrê agahîyanê hîrayan nîyê. Yeno vatene ke nê hêrişî de şehadetî qewimîyayê. No hêrl seva tersnayîşê şarê Silêmanî ame kerdene. Dewleta tirke kena ke Silêmanî de bi rehetî têbigêra û YNK zî sey PDKyî verê ci de têbigêro. Seba ke şarê Silêmanî û herêma Soranî tewirê xo yê welatperwerî ra fek vera nêdano no hêriş ame kerdene. Ma nê hêrişî şermezar kenê. Ma pê bawer ê ke şarê Silêmanî û herêma Soranî tewirê xo yê welatperwerî ra fek vera nêdo. Vera nê hêrişan ganî şarê Silêmanî û herêma Soranî tewirê xo bimojno.
Ma nê hêrişanê dewleta tirke yê bi xayînan şermezar kenê. Ganî her kes vera xayînî tewirêkê xurtî bimojno. Dewleta tirke konseptê qirkerdişê kurdan de îxanetî ra paştî gêna. Teyna bi vindarnayîşê nê îxanetî no konsept yeno çinkerdene. Eke rêxistinê kurdan, partî, roşnvîr, nuştox, hunermendî vera ney tewir bimojnê verê îxanetî do bêro girewtene. Ma reyna venga pêro kurdan danê ke welat û teberê welatî de vejîyê waran, vera îxanetî nêrazîbîyayîşêkê xurtî bimojnê. Ma venga partî, rêxistin, dezgeh û kesayetanê kurdan danê ke serkêşîya nê çalakîyan bikerê.” BEHDÎNAN
