Îdareyê Antî-Terorî (CTG) derheqê hêrişê bi droneyê çekdarî yê vera Meydanê Teyarayan ê Erbetî yê Silêmanî de eşkerayîyêke daye.
Eşkerayîye de dîya zanayene ke 3 pêşmergeyî şehîd bîyê û derheqê hêrişî de tehqîqat dîyayo destpêkerdene. Eşkerayîye de ame parekerdene ke detayê hêrişî bi sebebê asayîşî do nika bi temamî rayaumûmîye de nêrê parekerdene.
Serekê YNKyî Bafil Talabanîyî hêrişê vera Erbetî şermezar kerd û ard ziwan ke no hêriş vera serdestîya erdê Herêma Kurdîstanî û Iraqî binpaykerdiş o. Talabanîyî vat: ”Nê hêrişî seba çinkerdişê aramî û haştîya Herêma Kurdîstanî û Silêmanî ameyo kerdene. Erkê pêro terefanê sîyasîyan ê Herêma Kurdîstanî yo ke pîya vera gef û meseleyanê asayîşî têkoşîn bikerê û Kurdîstanî bipawê. Ma venga hukmatê Iraqî danê ke seba pawitişê erd û hasmênê welatî erkê xo bîyaro ca.
Ez venga pêro dostanê xo, hemwelatîyan û azadîgîran dana ke vera nê hêrişî tewirê xo bimojnê. Ma do bi yewîya xo nê hêrişan vindarnê.”
