Koordînasyonê KJKyî derheqê hêrişê vera Temsîlkarîya KNKyî ya Hewlêrî û Meydanê Teyarayan ê Erbetî de eşkerayîyêke daye. Eşkerayîye wina ya:
”Ma embaz Denîz Cevdet Bulbuno ke hêrişê Hewlêrî de şehîd bîyo û hîrê pêşmergeyanê ke Erbet de şehîd bîyê bi rêzî yad kenê. Ganî ma nê hêrişan qetî qebul nêkerê, bi pîlkerdişê têkoşînê vera îxanetî û qirkerdişî hesab bipersê.
Embaz Denîzo ke seba yewîya neteweyîye kedêka pîle daya, şexsê ey de no hêriş vera xîretanê yewîya neteweyî yê KNKyî ame kerdene. Bi parçekerdişê îxanetî û pîlkerdişê karanê yewîya neteweyîye ma do cewab bidê vîrameyîşê embaz Denîzî.
Dewleta tirke bi hêrişê Erbetî armanc kerd ke hemkarîya xo ya bi PDKyî pêro Başûrî ra vila bikera. Seba ke hêzê Kurdîstanî teslîmê dewleta tirke nêbenê no hêriş ameyo kerdene. Hêrişê vera Rojawan, Şingal, Biradost, Silêmanî û Hewlêrî nîşaneyê hemleya hêrişan a dewleta tirke yê. Xora PDK Zap û Metîna de serkêşîya hêrişanê dewleta tirke keno. PDK keno ke Biradost de şerî har bikero. Nê hêrişî zîyaretê Hakan Fîdanî ra dima dîyayî destpêkerdene.
Dewleta tirke şarê kurdî qir kena, PDK û keyeyê Barzanîyî zî hemkarîya nê sûcî kenê. Ganî vera PDK û Barzanîyan û hêrişanê dewleta tirke şarê kurdî tewirêkê zelalî bimojno, xoverdayîşî pîl bikero û hemleya yewîya neteweyîye xurt bikero. No do bibo cewabo tewr pîl.
Dewleta tirke hêrişan de PDK zî îxanet de hînî resayê asta tewr berze. Ganî şarê ma û cinîyî bivînê ke PDK vera gerîlayan têgêreno, dişmenî de hemkarîye keno, destkewteyanê Kurdîstanî parçe keno. Çarenûsê kurdan bi îxanetî dîyar nêbeno. Vera teslîmîyet û îxanetî wext wextê xoverdayîş û serkewtişî yo. Eke xoverdayîş bêro pîlkerdene û xeta îxanetî bêra çinkerdene seserra 21. do biba yê serkewtişê kurdan.
Nê hêrişî vera şaranê Iraqî zî yenê kerdene. Dewleta tirke kena ke Kerkûkê, Şengalê, Mexmûrê, Silêmaniyeyê û Hewlêr de provakasyonan bikera û Iraqî îşxal bikera. Dewleta tirke bi qiseyê ‘Ma teyna vera PKKyî şer kenê’ kena ke armancanê xo binimna. Têgêrayîşê ma seba yewîya demokratîke ya Iraqî, şaranê Rojhelatê Mîyanênî têkoşîn keno. Dewleta tirke û hemkarê ci terorizm kenê. Ganî şarê Iraqî plananê dewleta tirke bivînê û tewirê zelalî bimojnê.
Feslefeya ‘Jin, Jiyan, Azadî’ Kurdîstan de bîyo îradeyê cinîyan. Hînî cinîyî yewîya neteweyî ya demokratîke de hêzê serkêş ê. Ganî vera dewleta tirke û PDKyî ma vajê ‘hînî bes o’ û têkoşînî pîl bikerê. Vera hêrişan ma her ca de bi îradeyê xo têkoşîn bikerê û rayîr nêdê îxanet û qirkerdişî.
Ma venga pêro cinîyan ê kurdan, karker, dewij, roşnvîr, cinîyan ê akademîsyenan ke nê prosesî de têkoşînê hemparî aver verê û bi rolê xo yê tarîxîyî têbigêrê. Ganî cinîyê kurdî bikerê ke tarîx xo tekrar nêkero. Ma venga pêro cinîyan û hêzanê Kurdîstanî danê ke xeta xoverdayîşê têkoşînî û yewîya Kurdîstanî ya azade pîl bikerê.” BEHDÎNAN
