Denîz Bulbuno ke 18ê êlule de hêrişê vera Temsîlkarîya Kongreya Neteweyî ya Kurdîstanî (KNK) ya Hewlêrî de ame qetilkerdene, rixmê heme astengkerdişan meleketê ci Geverê Colemêrgî de ame definkerdene. Cenazaya Temsîlkarê KNKyî yê Başûrê Kurdîstanî Bulbunî Bêrê Sînorî yê Xebûrî de bi saetan ameyî vindarnayene û dima ra semedê otopsî ameye berdene Nêweşxaneyê Dewlete yê Şirnexî û heta saetanê şanî nêdîyaye keyeyî.
Badê otopsî cenaza hetê keyeyê Bulbunî ra ameye girewtene û rixmo ke nuqtayanê kontrolî yê leşker û polîsan de ameye astengkerdene bi konvoyî ameye berdene memleketê ci Geverî. Cenazaya Bulbunî ke dewa Bolukî de bi hewayêkê girseyî ameyî verwazîkerdene ke bi slogananê “Şehîd namirin” ameye berdene dewa Dêleze. Tîya semedê bulbunî merasîmo girseyî ame kerdene. Hemsereka DBPyî Salîha Aydeniz, Vervatoxa Partîya Çep a Keske Çîgdeme Kiliçgun Uçar, aktîvîstê TJA, îdarekar û endamê partîyanê sîyasîyan zî tede bi hezaran kesî tewrê merasîmî bîyî.
Bado ke wecîbeyê dînî yê cenazaya Bulbunî ameyî caardene bi slogananê “Şehîd namirin”, “Bimre îxanet, bijî Kurdistan” û “Ey şehîd xwîna te li erdê namîne” bi rayraşîyayîşî ameye berdene mezelan. Bulbun tîya bi sloganan ame definkerdene.
Vervatoxa Partîya Çep a Keske Çîgdeme Kiliçgun Uçara ke serê mezelê Bulbunî de qisey kerd, şarê kurdî û KNKyî rê serweşîye waşte û nê vatî: ”Heme ganê ke ma vînî kerdî erjê şarê kurdî û têkoşînî yê. Nê erjî wayîrvejîyayîşî heq kenê. Bi seserran o ke têkoşînê şarê kurdî yeno rayraberdene. Çi heyf ke hem Tirkîya de hem zî Rojhelatê Mîyanênî de her cayo ke kurdî tede ciwîyenî de no têkoşîn raştê hêrişanê girdan yeno. Bado ke Wezîrê Karanê Teberî yê nê welatî Hakan Fidan şi herêma Kurdîstanî hêrişî zêdîyayî. Herêma Kurdîstanî bîya sey cayê cînayetan. Şarê kurdî sînoranê Tirkîya de têkoşîn kerd, hêzê xo îspat kerd û xoverdayîşê xo canêverda. Tirkîya nika se kena? semedê şerê xo yê vera kurdan kena ke îtîfaqanê neweyan rono.”
Ucare veng kerd PDK û keyeyê Barzanîyî û wina vat: ”Kurdê ke zextê îqtîdarê Tirkîya ra remayî Herêma Federe ya Kurdîstanî de yenê qetilkerdene. Temsîlkarîya KNKyî 7 rojî 24 saetî binê kontrolê PDK û Asayîşî de ya, no cînayet senî bi? Senî qewimîya? Senî xebera şima çîn a? Senî beno ke şima derheqê na babete de yew vate zî nêvat? Heta ke qetilkarî û hêzê ke peyê înan de yê mevejîyê werte berpirsîyarê nê cînayetî PDK û keyeyê Barzanî yê.”
Uçare vat: ”Denîzo sînaye ti xeyr ameyî herra xo. Ti pîya bi têkoşînê xo ameyî. Şarê to tîya virar şi to ra. Ma soz danê to, têkoşîno ke to semedê yewîya neteweyîye ya kurdan rayra berdêne ma do biresnê serkewtişî. Sereyê ma perûne weş bo.”
Semedê Bulbunî de dewa Dêleze de tezîye bêro ronayene. COLEMÊRG
