Hatay de bi bahaneyê do mexdurê erdlerzî tede bi ca bikerê 14ê Nîsane de bi qerarnameyê sererkomarî, erdê dewa Dîkmece seba viraştişê awanîyê TOKÎyî ameyî îstîmlaqkerdiş. Hemwelatijî bado ke wesayîtê kar kewtî mîyanê erdî rewşe ra xeberdar bîyî û dest bi xoverdayîşî kerdî û cendermeyan reyde ameyî rî bi rî. Hemwelatijî dîyar kerdî ke heta ke no qerar nêro vindarnayîş do têkoşîn û herra xo terk nêkerê. Cinîyê Dîkmece dîyar kerdî ke no hewldayîşêk vera elewîyanê ereban o û vatî ke eke paştîdayîş nêro dayîş do eno îstîmlaqkerdiş hîna zêde bibo.
‘Ez bi dewlete bawer nêkena’
Nesrîn Doguya ke xoverdayoxê Dîkmeceye ra yew a dîyar kerd ke ê tersê ke do herra înan bêra îstîmlaqkerdiş her roje kontrolê tapu kenê û vat ke dewlete îtîrazê înan cidî nêgêna û wina dewam kerd: “Dewlete herra elewîyanê ereban îstîmlaq kena. Tîya de nêrazîbîyayîşê vera nasnameyî vejîyeno raşte. Qey dewê Oglakoren, karaksî nîyê? Çike uca ra AKPyî rê raye vejîyeno. Ma nêbenê AKPyî. Qey badê erdlerzî AFAD, Kizilay nêame hetkarîya ma? A roje seba ma cehennem bî la xema kesêk nêbî. Cenazeyê ma binê xirban de mendî. Kesêk vengê ma nêeşnawit. Nê caardişê taybet vera ma de pê yenê. Ez bi dewlete bawer nêkena.”
‘Bêxebera dewijan herra ma rotî’
Xoverdayoxan ra Sabahat Aysel Olgune zî reaksîyon mojna û vat ke roja ewil ya erdlerzî de merdimanê xo vînî kerda, keyeyê aye rijîyayo û wina vat: “Dima ra çeteyê dizî kewtî taxe. La heme taxî bîyî yew û yewbînan rê bîyî hetkar. Kewtî mîyanê paştîdayîşî. Kesê ke keyeyê înan çinî bî rê paştîdayîş ame dayîş. Hema nê çîyî dewam kerdêne sereyê ma ser de dronî firayî. Bê xebera ma herra ma îstîmlaq kerdî. Ma rayîr ra şîyayîşêk pê ard. 19 donim cayêk de û 6 donim zî cayêk de erdê keyeyê mi şî. Selahîyetdarî erdan ser de nîyê. Karkerî estê. Wa kesêk ma rê çîyêk bivajo. Qerarê îstîmlaqkerdişî bibo zî ma erdê xo terk nêkenê. Bi kam ci huqûqî îstîmlaq kenê? Ma binê îşxalî de yê. Ma do erdê xo nêteriknê.”
Sabahate qiseykerdişê xo wina peynî kerd: “Seke ma vera viraştişê awanîyan de bîyê, mojnenê. La ma çîyêk wina nêvanê. Ma vanê ke eke yenê virazenê wa xebera ma qenê bibo. Ma bi selahîyetdarê fîrmayê taşeron û leşkeran reyde ameyî rî bi rî. Ez vana ke eke herra mi nêra pawitiş şima leşkerê ma nîyê. Ma ameyî rî bi rî. Ez suc nêkena. Ez herra xo pawena.”
‘Têkoşînê huqûqî dest pêkerd’
Xoverdayoxan ra yew zî Meryem Kutluya û aye zî ard ziwan ke prosesê îstîmlaqkerdişî nimite ameyo kerdiş û teblîgat înan rê nêameyo şirawitiş û vat: “Makîna ameyî mîyanê erdî. Dima ra ma musayî. Ma avûkatan ra malumat girewt. Nika ma bi komî dewa akenê. Seba ke qerar bêro vindarnayîş ma dewa akerê. Ma do hetê huqûqî de zî heqanê xo bipawê. Ganî seba ma hîna zêde paştîdayîş bêra dayîş. Ma xover nêdê do hîna zêde talankerdiş bibo. Do bi hawayêkê şîdetin hêriş bibo. Dîkmece şêro do Serînyol, Karaalî û Samandagî zî şêrê. Ma xover nêdê do hêrişê ma bikerê. Selahîyetdarêk dewijan reyde nêkewt dîyalogî. Ma do destur nêdî talankerdişî. Wa bibê muxatabê ma û ma reyde mase de ronişê.” HATAY
