Xebatkaranê Ozgur TVyî yê Rojawanî derheqê wefatê rojnameger Seyîd Evranî de eşkerayîyêke daye. Kedkaranê Ozgur TVyî sere de kedkaranê ajansê ma ra, endamanê YRA, keye û dostanê Evranî ra serweşîye waşte.
Eşkerayîye de ame parekerdene ke Seyîd Evranî tim seba çapemenîya azade û Kurdîstanê azadî xîret kerd, vera çapemenîya burjuva seba çapemenîya şorişgêre têkoşîn kerd. Eşkerayîye de wina ame vatene: ”Ey Vakurê Kurdîstanî de prosesanê girîngan de wezîfe û mesuldarîyê krîtîkî ardî ca. Ey seba daşinasnayîşê Şorişê Rojawanî zî kedê pîlî dayî û tecrubeyê xo seba çapemenîya Rojawanî pêşkêş kerdî.
Sey rojnamegeranê sosyalîstan ê Rojawanî ma embaz Seyîd Evranî û pêro şehîdanê çapemenîye bi rêzî yad kenê. Ma do karanê çapemenîya sosyalîste û azadîye tim bikerê.
Embazê ma, kedkarê çapemenîye yê ercîyayeyî Seyîd Evranî seba raştîyan, têkoşînê azadîye yê Kurdîstanî de 30 serran rojnamegerîye kerde. Ma do tecrubeyanê ey ê 30 serran bikerê hêzê çapemenîya azade û sosyalîste û biresnê pêro bindestan, cinîyan û ciwanan. Ma embazê xo Seyîd Evranî bi minet û hûrmetî yad kenê!”
