Komxebata Sûrîye ya Diyîne bi sernameyê ‘Goreyê fikranê Abdullah Ocalanî, stratejîya tarîxî ya têkilîyanê kurd-ereban’ Reqa de ameye kerdene. Herêmanê Sûrîye ra 150 temsîlkarê partîyan, rêxistinan û kesayetan tewrê komxebate bîyî.
Serekê Meclîsê Dêra Zorê yê Partîya Amayoxê Sûrîye Samir El Şemerîyî têkilîyê kurd û ereban şirove kerdî û da zanayene ke kurd û erebî tim heman cografya de ciwîyayêne.
Cigêrayox, akademîsyen û sîyasetmedar Îbrahîm El Qeftanî pare kerd ke dewletanê hegemonan erdê ereban û kurdan parçe kerdo.
Sekretera Pêroyî ya Yewîya Cinîyan ê Ereban a Afrîka Besme Hemdî ard ziwan ke kurdî û erebî ganî vera îşxalê erdê xo pîya têkoşîn bikerê.
Sereka Meclîsê Rayberdişî yê MSDyî Îlham Ehmede komxebate de bale ante serebûtanê Dêra Zorê ser û vat: ”Hêzê îşxalkerî kenê ke herême de mabênê kurdan û ereban de şer vejê. Dewleta tirke kena ke herême de provakasyonan bikera û şarê herême pêbikewê.”
Komxebate bi netîcename vizêr qedîyaye. Endamê PYDyî Xalîd Omerî netîcename wend. Netîcename wina yo:
”Komxebate de derheqê tarîxê têkilîyanê kurdan û ereban de, çareserîya krîzê Sûrîye û girîngîya têkilîyanê Rojhelatê Mîyanênî de nîqaşî ameyî kerdene. Komxebate de tarîxê têkilîyanê kurdî-erebî û îmkanê averberdişê nê têkilîyan ameyî nîqaşkerdene.
Beşdaran girîngîya caardişê paradîgmaya Rayberê Şarê Kurdî Abdullah Ocalanî îfade kerde. Beşdaran bale ante girîngîya xurtkerdişê sîstemê asayîşî û aramîye ser. Beşdaran dîyar kerd ke ganî krîzê Sûrîye bi dîyalog û beşdarîya Îdareyê Xoserî yê Rojawanî bêro çareserkerdene. Beşdaran waşt ke wa Îdareyo Xoser ê Rojawanî bêro şinasnayene. Beşdaran ard ziwan ke paradîgmaya Abdullah Ocalanî do bieşkera meseleyanê herême çareser bikera.
Beşdaran venga serekeşîr, risipî û kesayetanê sîyasîyan da ke wa erkê xo yê caardişê wayûbiratîya şaran bikerê, paştî bidê HSDyî. HSD pêro herême paweno û hêrişan şikneno.” REQA
