Hemserekê Konseya Rayberdişî ya KCKyî bi wesîleya serrgêra Komployê 9ê Teşrîna Verêne ya 1998î eşkerayîyêke daye. Eşkerayîye wina ya:
”Ma serra 26. ya Komployê vera Rayber Apoyî bi nefretî şermezar kenê. Ma Rayber Apoyî bi hesrete û heskerdişî selam kenê. Ma şehîdanê ‘Şima nêeşkenê tîja ma tarî bikerê’ yad kenê. Şarê kurdî tim vera dewleta tirke xoverdayîşê estbîyayîşî kerd. Serkêşîya Rayber Apoyî û şehîdanê ma de xoverdayîşo tewr pîl ‘Şerê Estbîyayîş û Azadîye’ yeno kerdene. La no xoverdayîş hetê hêzanê modernîteya kapîtalîste ra sey gefî ame dîyene û coka înan Komployê 9ê Teşrîna Verêne reyde Rayber Apo warê Rojhelatê Mîyanênî ra vet.
Komployê 9ê Teşrîna Verêne armanc kerd ke netewebîyayîşê kurdan bêro astengkerdene, Rojhelato Mîyanên bêro kerdene warê hegemonya, Rayber Apo bêro pasîfkerdene, têgêrayîşê kurdan bêro tasfîyekerdene, şerê tirkan û kurdan bidîyo destpêkerdene û pê xorinkerdişê meseleya kurdan verê demokratîkbîyayîşê Tirkîya bêro girewtene. Rayber Apoyî vera nê armancan xîret kerd ke hesabanê emperyalîst û komplogîran pûç bikero. Rayber Apo bi xoverdayîşî vera komployî vejîya û ey kerd ke verê şerê kurdan-tirkan bigêro.
Rayber Apoyî binê şertanê tecrîdî yê Îmraliyî de pê çareserîya demokratîke cewabê komployî da. Rayber Apoyî fikr û îdeolojîya tewr aver û moderne pêşkêşê şaran kerde. Ey paradîgmaya neteweya demokratîke afernaye. Ey bi pawitişanê xo manîfestoyê merdimanê azadan û komelê azadî pêşkêş kerd. Coka komplo nêeşka bireso armancanê xo. Xoverdayîşê Îmraliyî yê Rayber Apoyî merkezê têkoşînê ma yo. Çunke sîyasetê Îmraliyî vera pêro kurdan yeno kerdene. 25 serrî yo vera Rayber Apoyî tecrîd yeno caardene, vera gerîlayan bi her hawayî hêrşî yenê kerdene, şarê kurdî rê qirkerdiş yeno ferzkerdene û cografyaya Kurdîstanî tena qirkerdene. La rixmê nê kerdişan zî fikrê Rayber Apoyî her cayî rê vila benê.
Dewleta tirke ya îşxalkere, rejîmê AKP-MHPyî yo faşîst, hemkarê nînan û hêzê hegemonîkî wazenê ke komployî newe bikerê. Nê kurdayetîya hemkare û xayîne ya kahane fer kenê. La kurdî hînî resayê a aste ke verê nê hezan de çok nêşorê erdî ro. Ewro destkewteyê kurdan netîceya îdeolojî, felsefe, kede û xîretanê Rayber Apoyî de vejîyayî werte. Coka her ke destkewteyê kurdan zêdîyenê sîstemê Îmraliyî beno har. Çunke sîstem bi nê hawayî keno ke Rayber Apoyî ra qesas bigêro.
Rayber Apoyî reyde şarê kurdî zî Îmrali de yeno tepiştene. La şarê kurdî prosesê binvistişê komployî de yoo. Şarê ma yo kurdî perwerê Rayber Apoyî yo. Şarê ma destpêkî ra nata vera Komployê Mîyanneteweyî payan ser de yo û çalakîyan keno. Şarê ma dostanê xo reyde azadîya Rayber Apoyî kerda rojdemê xo û seba ney zî her ca de têkoşîn keno. Ma nê tewirê şarê xo selam kenê.
Gerîlayanê azadîye yê Kurdîstanî bingeyê têkoşînê xo îdeolojî, felsefe û rêxistinîya Rayber Apoyî ra girewtî û nê 25 serran de vera komployî ê bîyî hêzê esasî. Gerîlayî bi hawayêkê zixmî girêdayeyê Rayber Apoyî yê. Gerîlayî bi nê hêzî vera hêrişan xo ver danê. Dewleta tirke pê îmkananê NATOyî û teknolojî, bi çekanê nukleran û qedexeyan hêrişê gerîlayan kena û sûcanê şerî kena. Ganî nê sûcî bêrê muhakemekerdene. Çunke gerîlayî teyna şarê kurdî ney pêro şaranê dinya pawenê. Bi na wesîle ma xoverdyaîşê gerîlayan ê tarîxîyî selam kenê.
Nê 25 serran de şarê kurdî zî şaranê dinya de dostanîya xurte viraşte û têkoşînê vera komployî aver berd. Ma serrgêra 26. ya Komployê 9ê Teşrîna Verêne de venga şarê kurdî, dostanê înan û rayaumûmîya demokratîke danê ke komployî bi xurtêrî şermezar bikerê û konseptê tecrîdî yê AKP-MHPyî rê vajê BES O. Seba ke hêrişê bi merkezê Îmraliyî vinderê û Rayber Apo azad bibo ma venga pêro şarê xo û dostanê xo danê ke heta ke Komployo Mîyaneteweyî bin visîyo xoverdayîşî pîl bikerê.” BEHDÎNAN
