Amed de Komployê 9ê Teşrîna Verêne yê vera Rayberê Şarê Kurdî Abdullah Ocalanî rixmê astengkerdişê polîsan ame protestokerdene.
Çalakîya ke bi şîarê Abdullah Ocalanî rê azadîye meseleya kurdan rê çareserî ameye kerdene hetê KCD, DBP, TJA, MED TUHAD-FEDî ra ameye organîzekerdene. Sêrt, Colemêrg, Wan, Erzirom, Riha, Şirnex û Mêrdînî ra xeylêk kesî tewrê çalakîye bîyî.
Çalakîya ke Rezan de ameye kerdene wekîlê Partîya Çep a Keske Adalete Kaya, Serhat Eren û Halide Turkoglu tewrê ci bîyî. Şarê ke waşt tîya ra ver bi Koşuyolu rayra şiro, hetê polîsanê tirkan ra verê ci ame girewtene.
Eynî wextî de Hemserekê Pêroyî yê DBPyî Salîha Aydenîz û Keskîn Bayindir, wekîlê Partîya Çep a Keske Omer Ocalan, Sirri Sakik, Bêrîtan Guneş, Gulîstan Kiliç Koçyigît û Ceyna Akça zî tede grûbêka bîne Parka Koşuyolu de ameye têhet. Polîsan şar girewt binê ablûqa û vat seba ke walîtîye qedexe kerd, ê do destûrê çalakîye medê. Kesê ke nuqtayanê cîya cîyayan ê parke de gerîyayî binê ablûqa sloganê “Bijî Serok Apo”, “Bê Serok jiyan nabe” vatî.
Wekîlê Riha Omer Ocalanî ke vera hêrişan nêrazîbîyayîş mojna, vat, “Çew nêeşkeno ma rê zext, îşkence û zulmî bidê qebulkerdene. Ma tîya de yê, rewşa ma hêzdar a. Êyê ke şarê Amedî rê îşkence kenê , paştgêrê DAIŞî yê. Ma vera qirkerdişan çareserî wazenê. Rayîrê çareserî zî Birêz Ocalanî ra ravîyareno. Dewlete nê zana. Ma do eşkerayîya xo bidê. Birêz Ocalan meşrû yo, haştîye wazeno, huzûrê nê welatî wazeno. Ma do wayîrê ziwan, kultur, îrade û sîyasetê xo bivejîyê. Şima wekîlî girewtî binê ablûqa, şarê Amedî rê îşkence kenê. Şima paşt danê qirkeran. Ma semedê çareserî israr kenê, tîya de yê, nêşinê.”
Şaro ke Kuçeyê Koşuyolu de ame têhet komplo û ablûqa bi çapikan protesto kerd. Şar sloganê “Bijî berxwedana zindana”, “Jin, jiyan, azadî” vatî û dima ra kuçeyanê Kaynartepe de bi slogana “Bijî Serok Apo” rayraşîyayîş kerd.
Hemwelatîyan qezaya Rezanî de zî mîyanê kuçeyan de bi sloganan komplo protesto kerd. Polîsan hêrişê çalakwanan kerd û seba ke sloganî vatî cinîyêka extîyare destbend kerd. Çalakîye de 50 kesan ra zafêr kesî ameyî destbendkerdene.
Hetê bînî ra kesê ke qezaya Bismilî ra semedê tewrbîyayîşê çalakîye kewtî rayîr wesayîtê înan vejîyayîşê bajarî de hetê polîsan ra ameyî vindarnayene.
Taxa 5 Nîsane ya Rezanî de hemwelatîyî bi pankarta “Em de faşizme hilweşinin tecride biskinin” rayra şîyî. Esnaf û hemwelatîyan derûdorî ra bi çapikan û sloganan paştî daye. Çalakwanan sloganê “Bijî berxwedana İmralı”, “Be Serok jiyan nabe”, “Bi can bi xwin em tere ne ey Serok” vatî. Şarî balkonan ra bi çapik û nîşanê serkewtişî paştî daye. Rayraşîyayîş verê Nêweşxaneyê Baglarî de bi çapik û sloganan qedîya. AMED
