Hemserekîya Konseya Rayberdişî ya KCKyî bi eşkerayîyêke Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ selam kerde.
Eşkerayîye wina ya:
”Seke zanîyeno warê mîyanneteweyîyî de Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ dîyaye destpêkerdene. Zaf girîng û manadar o ke hetê dostan, sosyalîst, demokrat, azadîgîr û kesanê biexlaq û biwijdanan ra hemleyêka winayêne dîyaya destpêkerdene. Coka ma pêro dostanê xo rê sipas kenê. Bi na hemle cewabo tewr manadar û pîl dîya Komployê Mîyanneteweyîyî zî.
Şarê ma û têgêrayîşê ma 25 serrî yo vera Komployê Mîyanneteweyîyî têkoşîn kenê û tim dostê ma nê têkoşînî de hetê ma de bîyî. Hînî ewro nê dostê ma serkêşîya nê têkoşînî kenê. Bêguman no serkewtişê şarê ma û pêro kesan o. Ma na hemle selam kenê. Ma do bi pêro estbîyayîşê xo paştî bidê na hemle.
Na hemle mojnena ke têkoşînê vera Komployê Mîyanneteweyîyî resayo asta globale û kewto prosesê netîcegirewtişî. No globalbîyayîş seba têkoşînê azadîye û demokrasî yê dinya zî zaf girîng o. Rayber Apoyî seba ney dest pê têkoşîn kerdbi û o bi nê tewirê verê Komployê Mîyanneteweyîyî de vindert. Wayîrvejîyayîşê bi Rayber Apoyî yeno manaya wayîrvejîyayîşê xo, komelî, azadî û rûmetê merdimatîye. Merdimatîye ganî qetî vera tecrîdê Îmraliyî vejîya. Azadîya şarê kurdî û şaranê Rojhelatê Mîyanênî bi azadîya Rayber Apoyî mumkîn a.
Çareserîya meseleya kurdan û meseleyanê Rojhelatê Mîyanênî bi qedîyayîşê sîstemê Îmraliyî û azadîya Rayber Apoyî mumkîn a. Hêrişê dewleta tirke yê vera Rojawanî û Sûrîye û serebûtê Îsraîl û Filîstînî nimûneyê ney ê. Meseleyê Rojhelatê Mîyanênî pê ferasetê netewe-dewlete çareser nêbenê. Rayber Apoyî bi paradîgmaya modernîteya demokratîke û neteweya demokratîke çareserîya meseleyan vete werte.
Bi nê ferasetî ma nê vengdayîşan kenê;
Ma venga şarê Kurdîstanî yê welatperwerî danê ke bi hawayêkê xurtî tewrê na hemleya dostanê ma bo, Rojhelatî ra heta Başûrî wurzo payan ser. Wa roşnvîr û rêxistinê demokratîkî serkêşîya şarî bikerê. Vakur de wa ablûqaya AKP-MHPyî bêra çinkerdene. Ciwanê kurdî wa refanê vernîyan de cabigêrê, xo rêxistin bikerê û serkêşîya şarî bikerê. Erkê pêro şarê ma û ciwanan o ke tecrîdî bişiknê û azadîya Rayber Apoyî bîyarê ca.
Ma venga pêro demokrat, roşnvîr, welatperwer, averwazanê Tirkîya û hêzanê demokrasî danê ke tecrîdo mutleq yeno manaya tecrîdê vera şarê kurdî û şaranê Tirkîya. Îqtîdarê AKP-MHPyî yo faşîst pê çinkerdişê Şorişê Rojawanî û qirkerdişê kurdan keno ke estbîyayîşê xo awan bikero û bi nê hawayî Tirkîya ver bi tarîtîye beno. Coka ganî şima vera tecrîdê Îmraliyî tewirêkê zelalî bimojnê û hetê têkoşînê azadîye yê kurdan de cabigêrê.
Ma venga pêro şaranê Rojhelatê Mîyanênî û dinya danê ke Rayber apoyî teyna seba kurdan ney seba pêro şaranê dinya têkoşîn kerdêne û Îmrali de zî erjê merdimatîye pawitî. Ganî şima vera tecrîdê mutleqî tewirêkê hîna xurtî bigêrê û azadîya Rayber Apoyî bîyarê ca.
Ma bi nê hîs û vengdayîşan reyna Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ selam kenê û destek danê ci. Ma pê bawer ê ke hemle do ser bikewa.” BEHDÎNAN
