Hemserekê Pêroyî yê DBPyî Keskîn Bayindirî tecrîdê vera Rayberê Şarê Kurdî Abdullah Ocalanî, polîtîkayê qirkerdişî yê vera kurdan û rewşa peyêne ANFyî rê ercnayî.
Bayindirî da zanayene ke Komployê 15ê Sibate ra nata Abdullah Ocalan Îmrali de binê tecrîdêkê giranî de yo û vat: ”Birêz Ocalanî teer peyên adara 2021î de keyeyê xo de pê telefonî qisey kerd û 2019 de zî avûkatê xo dîyî. Na rewşe persa ‘Îmraliyî de çi qewimîyenê?’ xo de ana. Sîstemê tecrîd û îşkenceyî yê vera Birêz Ocalanî ra qesawetê ma tim zêdîyeno. Weşî û azadîya Abdullah Ocalanî teyna kurdan ney pêro şaranê dinya eleqedar kenê. Çunke birêz Ocalan temînatê azadîya şaran o. Ewro ma vînenê ke kerdişê sîstemê Îmraliyî pêro zîndanan û komelî rê vila bîyê. Bi taybetî wextê peyênî de mergê tepişteyanê nêweşan zêdîyayê. Îqtîdarê AKP-MHPyî wazeno bi sîstemê Îmraliyî îradeyê tepişteyan bişikno.”
Bayindirî dîyat kerd ke sîstemê Îmraliyî û hêrişê vera kurdan hetê perspektîfê şerê taybetî yê dewlete ra yenê kerdene û vat: ”Dewlete kena ke kurdan bênasname bikera û îradeyê kurdan teslîm bigêra. Coka Rayber Apoyî zî tecrîd kena. La Birêz Ocalanî Îmrali de tim bi xoverdayîşê xo vera hêrişan têkoşîn kerd. Îmrali merkezê planê qirkerdişê kurdan o. Pêro kurdî hedefê hêrişanê Îmraliyî de yê. Tecrîd û qirkerdişê kurda girêdayey yê. Hêrişê vera Rojawanî zî na çarçewe de yenê kerdene. Her ke tecrîd yeno girankerdene hêrişê vera kurdan zî zêdîyenê û giran benê.”
Bayindirî îfade kerd ke seba şiknayîşê tecrîdî ganî xeta têkoşînî bêra xurtkerdene û dînamîkê ney o sereke zî şarê kurdî yo. Bayindirî vat: ”Seba ke têkoşîno nikayên qîm nêkeno tecrîd dewam keno. Na babete de sey DBPyî ma rexneyanê xo danê. Ganî ma vera tecrîdî têkoşînêkê hîna xurtî bikerê. Heta ke tecrîdê Îmraliyî nêqedo meseleya kurdan zî nêna çareserkerdene. La tay hêzê Kurdîstanî na raştîye peygoş kenê. Meseleya tecrîdî û kurdan teyna kurdan ney pêro hêzanê demokrasî û muxalefetî eleqedar kena. Rayîro hîrêyîno ke Birêz Ocalanî pêşkêşê şaranê Tirkîya û Kurdîstanî kerdo seba çareserîya pêro meseleyan girîng o. Na çarçewe de ganî ma seba şiknayîşê tecrîdî têkoşînê hemparî bikerê. Bi têkoşînê rêxistinbîyayeyî û qerardarî ma eşkenê tecrîdî bişiknê.” STENBOL
