Konseya Rayberdişî ya KCKyî derheqê şerê Îsraîl-Hamasî de eşkerayîyêke daye. Eşkerayîye wina ya:
”Hêrişanê Hamasî yê 6ê teşrîna verêne ra dima Îsraîlî zî hêrişê filîstînijan kerd û nê şerî de bi hezaran îsraîlij û filîstînijan dinyaya xo bedilnaye. Nê hêrişî bîyî qirkerdiş. Ma zî zaf kewtî verê na rewşe. Ma hem şarê mûsewîyan rê hem zî şarê filîstînî rê serweşîye wazenê. Çîyê ke heta nika ameyê kerdene û senaryoyî zaf qerqilnenê. Nê kerdişî xelet ê û benê sebebê qirkerdişî. Ganî terefî cade nê tewirî ra abigêrê û hêrişanê xo vindarnê.
Metodê Hamasî xelet ê û tewirê Îsraîlî zî nêno qebulkerdene. Ganî dewleta Îsraîlî hêrişan û ablûqaya vera Gazze biqedîna.
Meseleya Filîstînî pê demokrasî û şinasîyayîşê şaranê Filîstînî çareser bena. Şîdet do netîceyêke nêdo. Serebûtê peyênî netîceyê çaresernêkerdişê mesele yê. Nê serebûtan mojna ke paradîgmaya neteweya demokratîke ya Rayber Apoyî seba çareserîya meseleyanê Rojhelatê Mîyanênî çend girîng a. Bingeyê meseleya Îsraîl-Filîstînî de ferasetê netewe-dewlete est o. Bi paradîgmaya Rayber Apoyî şarê Rojhelatê Mîyanênî eşkenê mîyanê haştîye de biciwîyê.
Dewaya şarê Filîstînî meşrû ya. Sey têgêrayîşê azadîye yê kurdan ma tim hetê dewaya şarê Filîstînî de yê. Seba ke Rojhelatê Mîyanênî de demokrasî û çareserîye aver şorê sey meseleya kurdan ganî meseleya Filîstînî zî bêra çareserkerdene. Dewleta Îsraîlî ganî estbîyayîş û îradeyê şarê Filîstînî bişinasna. Şarê mûsewîyan heta ke meseleya Filîstînî çareser nêba nêeşkeno wijdanê xo rehet bikero.
Dewleta tirke û îqtîdarê AKP-MHPyî bi hawayêkê samîmî û durîstî nêzdîyê meseleya Filîstînî nêbenê. Erdogan na mesele seba qirkerdişê kurdan sey hacetê bazarîye şuxilneno. Ê qetî hetê şarê Filîstînî de nîyê. Eke Erdogan û dewleta tirke samîmî bibîyêne meseleya kurdan çareser kerdêne. Senî ke Îsraîl heta meseleya Filîstînî çareser nêkera nêbena demokratîk, Tirkîya zî heta ke meseleya kurdan çareser nêkera nêbena demokratîke. Erdogan, îqtîdarê AKP-MHPyî û dewleta tirke dirîtîye kenê. Erdogan hem vano kerdişê Îsraîlî raşt nîyê hem zî vano ke ê do hîna zaf hêrişê kurdan bikerê. Dewleta tirke hêrişanê vera Rojawanî de pêro binawanîye, awbend, kargeh, tesîs, depo, biranê petrolî, îtasyonan û sivîlan kena hedef. Bi desan merdimî nê hêrişan de ameyî qirkerdene.
Êyê ke verê kurdan de wina têgêrenê, bi samîmîyetî hetê şarê Filîstînî de nêvindenê. Hetê bînî ra êyê ke hêrişanê vera Rojawanî rê vengê xo nêkenê zî bi raştî tênêgêrenê. Hêsirê Erdoganî sexte yê. Dinya zanena ke Erdogan û dewleta tirke senîn ê.”
