Vizêr Wezîrîya Weşîye ya Gazze da zanayenne ke Îsraîlî hêrişê Nêweşxaneyê El Mamedanîyî yê Gazze kerdo û tewr tay 500 kesan hêriş de dinyaya xo bedilnaya. Wina pawîyeno ke hûmara merdeyan bizêdîya.
Îsraîlî dibistana Kampa Multecîyan a El Magazî ya Neteweyanê Yewbîyayeyan zî daye bombayan ver û hêriş de tewr tay 6 kesan dinyaya xo bedilnaye.
Hêrişê Îsraîlî yê vera nêweşxaneyî ra dima Serekê dewleta Filîstînî Mehmûd Abbasî pare kerd ke Îsraîlî pêro sînorê merdimatîye binpay kerdê û naye ra pey Filîstîn qedîyayîşê şerî ra ber çîyêkê bînî qebul nêkero.
Hêrişê vera nêweşxaneyî ra dima pêvînayîşê Misir, Filîstîn, Urdun û Amerîka zî ame betalkerdene û Mehmûd Abbas agêra Filistînî. Hetê bînî ra artêşa Îsraîlî îdîa kerd ke hêrişê vera nêweşxaneyî hetê Tugayê Cîhadê Îslamî yÊ Hamasî ra ameyo kerdene. Xeylêk welatanê ereban û Îranî de hêrişê vera nêweşxaneyî ame protestokerdene. Mutefîqê Hamasî Hîzbullahê Îranî roja çarşemeyî sey ‘roja hêrsî’ îlan kerde. Hetê bînî ra artêşa Îsraîlî pê hesna ke înan di fermandarê Hamasî ‘îmha kerdê.’
Bîlançoya peyêne
Goreyê selahîyetdaranê Filîstînî 7ê teşrîna verêne ra nata Gazze de Îsraîlî domanî zî tede tewr tay 3 hezar kesî kiştê. Goreyê artêşa Îsraîlî zî heta nika 1400 îsrailîjî kişîyayê û 199 kesî zî ameyê remnayene.
9ê teşrîna verêne de Îsraîlî aw, ceyran û gazê Gazze birnayî. Heta nika Gazze de 5434 bînayî texrîb bîyî û 2 hezar û 185 bîna rijîyayî. Sînorê Lubnan û Îsraîlî de zî pêkewtişî giran benê. Hîzbullahê Lubnanî pare kerd ke înan dayo tankêkê Îsraîlî ro. Ewro Sekreterê Pêroyî yê Neteweyanê Yewbîyayeyan (NY) Antonio Guterresî venga Îsraîl û Hamasî da ke wa cade adirbirnayîşêkî îlan bikerê.
