Fermandarîya Qerargehê Merkezê Pawitişê Şarî (MPŞ) bi eşkerayîyêke da zanayene ke înan Kampa Multecîyan a Şehîd Rûstem Cûdîyî ya Mexmûrî ra apey antê. Eşkerayîye wina ya:
”Dewleta tirke 8 serrî yo seba tasfîyeya gerîlayan û qirkerdişê şarê ma hêrişê xo zêdînayî. Bi nê armanî hêcerî tescrîdê Îmraliyî giran kerd û xîret kerd ke şarê ma, sîyasetê kurdan û têgêrayîşê çepî yê Tirkîya qels bikera, îradeyê înan bianca. Hukmatê AKPyî 2014 de zî waştbi ke nê armancan bi destê DAIŞî bikero. La dima hêrişê DAIŞî ameyî şiknayene. Şarê ma hêzanê xo yê pawitişî reyde nêverda ke DAIŞ Rojhelatê Mîyanênî de bibo împaratorîyêke. Hêzanê ma vera DAIŞî şer kerd, merdimatîye xelisnaye û rolê xo yo tarîxî mojna.
2014 de DAÎŞo ke amebi xurtkerdene û şaristanê sey Mûsil û Reqa de vistbî destî, hêrişê xeylêk herêmanê Kurdîstanî kerd. O çax ferman û vengdayîşê seferberîye yê Rayber Apoyî, gerîlayê azadîye kewtî dewre. Zanîyeno ke sey HPGyî ma roja verêne hêzê xo şawitî Şingalî û verê qirkerdişê êzidîyan girewt. Dima ma hêzê xo şawitî Kerkûk, Mexmûr, Dihok, Laleş, Şingal û Kobanê û bi nê hawayî rewşe vurnaye. Ma eyaletanê Botan, Zagros, Amed, Garzan û Erzîromî ra hêzê xo yê fedayîyî yê tecrubeyînî şawitî nê cayan. Eke ma no nêkerdêne mumkîn nêbîyêne ke DAIŞ biameyêne vindarnayene. Reyna zanîyeno ke dima ma hêzê xo yê HPG û YJA-Starî 2017-2018î ra dima apey antî.
Safhaya tewr girîngî ya nê prosesê tarîxîyî hêzê ma yê Kampa Multecîyan a Şehîd Rûstem Cûdîyî ya Mexmûrî. Îdareyê têgêrayîşê ma resa na netîce ke hêzanê ma yê Mexmûrî zî erkê xo temam kerdê û bire daya ke hêzanê xo yê Mexmûrî zî apey biancê. Destpêkê êlule ra nata hêzê ma yê HPG û YJA-Starî bi hawayêkê nimite, rêxistinî û plankerdeyî resayî Herêmanê Pawitişî yê Medya. Nika Mexmûr de qet yew hêzê ma çin o.
Wa şarê ma yo welatperwer û rayaumûmîye bizano ke hêzanê ma wezîfeyê xo temam kerdê û hînî hewce çin o ke uca de bimanê. Derheqê nê apeyantişê hêzan de çewî çîyêk nêwaşt. Na bire bi temamî hetê têgêrayîşê ma ra ameya girewtene.
Ma pê bawer ê ke şarê ma yê Mexmûrî yo welatperwer û ercîyaye manaya raşte bido na bira têgêrayîşê ma. Ma pê bawer ê ke şarê ma yê Mexmûrî hînî wayîrê ferasetê neteweya demokratîke yo, sey verî nîyo û nika ra pey do bieşko rêxistinîya xo ya sivîle bipawo. La eke astêka berze de hewce bibo fedayîyê Apogîrî sere de herêmanê Mexmûr û Şingalî xo biresnê her cayî, hetkarîya şarê ma bikerê, erkê xo yê pawitişê şarî qetî bîyarê ca.
Bi na wesîle ma ancî şehîdanê ke Şingal, Kobanê, kerkûk û Mexmûr de serkêşîya têkoşînê vera DAÎŞî kerda, bi minet û hûrmetî yad kenê. Ma verê vîrameyîşê înan de sereyê xo anê war û soz danê pêro şehîdanê ma ke wayîrê vîrameyîşanê înan vejîyê. Şarê ma yo ke heta nika serê rayîrê şehîdan de xoverdayîşêko tarîxî kerdo, nika ra pey zî do mesuldarîya xo tim bîyaro ca. Ma hûrmet û heskerdişê xo şawenê û têkoşînê azadîye de her kesî rê serkewtiş wazenê.” BEHDÎNAN
