Karkerê Şîrketa Vilakerdişê Ceyranî ya Firatî (FEDAŞ) 73 rojî yo seba ke şertê xebitîyayîşî bêrê weşkerdene xo ver danê. 7 karkerê FEDAŞî seba ke waştişanê înan bêrê caardene vejîyayî serê banê kargehî û înan pankarta ‘Aksa sozê xo bîyarê ca, waştişanê ma bikerê’ akerde.
Karkeran da zanayene ke heta ke waştişê înan nêrê caardene ê do serê banî ra war nêrê.
DÎSK/Enerjî-Senî hesabê xo yê medyaya dîjîtale de derheqê babete de vat: ”Eke çîyêk bêro sereyê embazanê ma mesuldarê ci Mudirê FEDAŞî yê Xarpêt û Dêrsimî û îdarekarê Şîrketa Kazanci Holdîngî zî tede pêro kes ê.” DÊRSIM
