Avûkatanê Buroyê Huqûqî yê Asrinî seba ke muwekîlanê xo Rayberê Şarê Kurdî Abdullah Ocalan, Hamîlî Yildirim, Veysî Aktaş û Omer Hayrî Konarî de pêvînayîş bikerê, 10ê teşrîna verêne de muracatê Hakîmîya Înfazî ya Bursa kerdbi.
Goreyê xebera Ajansê Mezopotamya avûkatan muracat de waşt ke wa muwekîlanê xo bivînê, eke cezaya dîsîplînî ya newîye est ba wa dosyaya ci bêra dayene înan û eke cezaya newîye dîyaya wa bêra betalkerdene.
Hakîmîya Înfazî 13ê teşrîna verêne de cewab da muracatî û pare kerd ke Rayberê Şarê Kurdî û tepişteyanê Îmraliyî yê bînan rê ancî ‘cezaya dîsîplînî’ dîyaya. La nêzanîyeno ke na ceza key, çira û senî ameya dayene.
Hakîmîya waştişê teslîmê dosyayanê ceza bi bahaneya ‘çapemenîye de weşanîyenê’ red kerd.
