Endama Komîteya Merkezî ya PKKyî Hêlîn Umît Bernameyê Taybetî yê Medya Haber TVyî de rojdem ercna.
Qiseykerdişê Hêlîn Umîte ra tay noqtayê girîngî wina yê:
”Rayber Apo 25 serrî yo Îmrali de xoverdayîşêkê bêemanî keno. Şexsê Rayber Apoyî de hêrişê vera kurdan zî zêdîyenê. Tecrîdo ke vera Rayber Apoyî yeno kerdene, cayêkê dinya yê bînî de çin o. La rixmê nê tecrîdî zî fikrê Rayber Apoyî pêro dinya rê vila benê.
Seba azadîya Rayber Apoyî zî xîretî est ê. Tewr peyên Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ hetê dostanê ma ra dîyaye destpêkerdene. Na hamele zaf girîng a la ganî bi eşkerayîyan sînorkerde nêmana. Seba azadîya Rayber Apoyî ganî çalakî û aktîvîteyê xurtî bêrê kerdene. Xora hemserekîya ma eşkerayîya xo û embaz Cumayî (Murat Karayilan) qiseykerdişê xo de no çi îfade kerd.
Komployê vera Rayber Apoyî vera Rojhelatê Mîyanênî mudaxeleyo verên bi. Ewro rewşa Rojhelatê Mîyanênî werte de ya. Iraq, Sûrîye û cayanê bînan de şer est o. Vera na rewşe her wextî ra zêdeyêr hewceyê ma bi azadîya Rayber Apoyî û paradîgmaya ci ya çareserîye est o.
Çalakîya fedayî ya Anqara her hetî ra bêqusur bîye. Milîtananê PKKyî cayêko ke bi xurtî yeno pawitene tede çalakîyêka fedayîye kerde. Na çalakîya embazanê ma Erdal û Rojhatî xeta ma ya şerî rê bîye nimûne. Eke biwaştêne embazê ma eşkayêne bi hawayêkê cîyayî na çalakîye bikerê. La têgêrayîşê ma qetî sivîlan nêkeno hedef. Yanî gerîlayî biwazê eşkenê her ca de û her wext çalakîyan bikerê. Coka dewleta tirke hende panîk kerd.
Dewleta tirke bi bahaneya na çalakîya fedayîye hêrişê Rojawanî kerd. Xora zanîyeno ke seba îşxalê Rojawanî dewleta tirke tim gêrena bahaneyan. Na çalakîye nêameyêne kerdene zî dewleta tirke do hêrişê Rojawanî bikerdêne. Dewleta tirke dişmena pêro kurdan a û seba ke kurdî wayîrê statuyêkî nêbîyê eşkena her hawayî hêriş bikera. Dewleta tirke Rojawan de sivîlan qetil kena la hetê bînî ra Îsraîlî rexne kena. Dewleta tirke zî kopyaya Îsraîlî ya.
Herêmanê Pawitişî yê Medya de şer bi giranî dewam keno. No şer komelî rê zî vila bîyo. Aseno ke şer do Rojhelatê Mîyanênî de vilayê her cayî bibo. Dewleta tirke ney do xo rê bikera zemîn û hîna zaf hêrişê kurdan bikera. Nê prosesî de pêro kurdî û cinîyê kurdî vera îşxalkeran û kolonyalîstan wa qetî xo sey hêzêkê şerî awan bikerê. Ganî her ca de pêro kurdî vera îşxalkeran pozîsyonê xopawitişî bigêrê.
Ewro dinya reyna kewta prosesê şerî ke merkezê nê şerî Rojhelo Mîyanên û Kurdîstan o. Şerê Îsraîl-Filîstînî zî îsbatê nê prosesî yo. Şer safhaya newîye de ya. Nê şerî ra felate bi paradîgmaya Rayber Apoyî mumkîn a. Ganî neteweya demokratîke hetê şaran ra bêra esaskerdene. Hêrişê Îsraîlî yê qirkerî û têgêrayîşê Hamasî yê sey DAIŞî nênê qebulkerdene. Nê wirdî zî xelet ê. Dewaya şarê Filîstînî heq a. La tewirê Hamasî raşt nîyo. Seke Rayber Apoyî vatbi Hamas seba ke Rêxistina Xelisnayîşê Filîstînî bêra bêtesîrkerdene ronîyabi. Hamas Huda-Parê Filîstînî yo. Ma heta peynî paştî dana dewaya şarê Filîstînî. La ma Hamasî qetî tesdîq nêkenê. Ganî şarê Tirkîya, Îran, Sûrîye, Iraq û pêro Rojhelatê Mîyanênî vera nê hêrişanê modernîteya kapîtalîste yewîya xo awan bikerê.
Ez Fermandare Bêrîtane-Gulnaze Karataş bi rêz û minetî yad kena. Embaza ma Bêrîtane şerwanêka sembol a. Şehadetê aye bi temînatê artêşbîyayîşê cinîyan. Bi na wesîle ez serrgêra 31. ya ronîyayîşê YJA-Starî zî selam kena. Xora artêşbîyayîşê cinîyan teyna seba ma ney seba pêro dinya zaf girîng bîyo. Pêro dinya girîngîya artêşa cinîyan xoverdayîşê vera DAÎŞî de, Rojawan de şexsê YPJyî de dîye.
Embaza ma Bêrîtane bi çalakîya xo xetêke afernaye. Coka a cinîyêka serkêş a. Embaze Bêrîtane mojna ke ganî cinîyêka azade senî biciwîya, xo ver bida û têkoşîn bikera. Embaze Bêrîtane bi tewirê xo yê şerî vera xeta tasfîyekere-xayîne cewabêko tewr raşt da. Ewro zî vera xeta îxanetî tewirê embaze Bêrîtane xeta xoverdayîşî temsîl keno. Ewro bi hezaran Bêrîtanî koyan de û metropolan de est ê û xeta aye teqîb kenê.” BEHDÎNAN
