Hemserekanê HEDEPî Tulay Hatîmogullari û Tuncer Bakirhanî verê Kampusê Zîndanê Sîncanî de derheqê Dewaya Kobanê de eşkerayîyêke daye. Endamê Meclîsê Partîye, Hemserekê HDPyî Cahît Kirkazak û xeylêk temsîlkarê partî û rêxistinan tewrê eşkerayîye bîyî.
Hemserekê HEDEPî Tuncer Bakirhanî ard ziwan ke Dewaya Kobanê de sîyaseto demokratîk yeno muhakemekerdene û vat: ”Mehkemeyanê Îstîklalî ra nata na dewa dewayêka dafike ya tewr pîl a. Na dewa dewayêka dafike ya û na dewa de destkewteyê şarê kurdî yenê muhakemekerdene. Na dewa ewro 7 serrî xo pey de verdayî. La ma do qetî apey game nêerzê û vera tarîtîyanê sey DAIŞî tim têkoşîn bikerê.
Na dewa darbeyêka sîyasî ya. Tewr peyêne Roja Kobanê ya Dinya de embaza ma Huda Kaya tepişîyabî. Dewleta tirke qetî statuyê Rojawanî qebul nêkena û bi tepiştişê Huda zî nê mesajî dana. Na dewa seba ma seke çin a. Peynîya peyêne de na dewa do bêra mehkumkerdene.”
Tulaye Hatîmogullari vat: “Na dewa darbeyêka sivîle ya dergkerde ya ke hetê îqtîdarî ra yena îdarekerdene. Kobanê yew hemleya xoverdayîşî bîye. Pêro dinya bîye şahîda nê xoverdayîşî. Kobanê de teyna erdê kurdan ney erdê ereban û tirkan zî ame pawitene. Dewlete seba ke pê sîyasetê kurdan nêeşkaye na dewa sey şantajî şuxilnena. Ma Dewaya Kobanê pûç kerde. Ganî embazê ma yê tepişteyî vera bidîyê. Seba ney ma do heta peynî xo ver bidê.” ANQARA
