Têgêrayîşê Cinîyê Azade (TJA) bi sloganê ‘Bi jin jiyan azadî reyde ver bi azadîye ra’ Şirnex û Stenbol de startê kampanyaye dabî destpêkerdiş. Kampanyaye do heta 8ê Adare dewam bikera. Çarçeweya kampanyaye de xebatê perwerdeyî û kargehan yeno organîzekerdiş. Perwerdeyî û xebatê kargehan de babetê sey tecrîd, polîtîkayê taybet ê şerî, camêrd, şîdet û ûsn. yenê munaqaşakerdiş.
Aktîvîsta TJAye Nevriye Çur û Hemşaredara Pîranî Yasemîn Uçere derheqê kampanyaye de ajansê JINNEWSî rê qisey kerdî.
Seba çi kampanya?
Nevriye da zanayîş ke bi taybetî îqtîdar Kurdistan de polîtîkayê şerê taybetî dewam keno û wina dest bi qiseykerdişê xo kerd: “Vera îhlalkerdişê heqê merdiman de na kampanya dîyaye destpêkerdiş. Îqtîdar hemverê şarê kurdî de polîtîkayê pelçiqnayîşî dano rayîr ra berdiş. Sewbîna zî bi taybetî cinî, ciwan û tutî hedefê yewine yenê weçînayîş. Tecrîdê hemverê Birêz Abdullah Ocalan û heme tepişteyan vejîyayo merheleyêka tewr cor. No tecrîd bi no hawa vilayê heme raşteyê cuye bîyo. Ma vera nê caardişan de kampanyaya xo da destpêkerddiş.”
Nevriye dîyar kerd ke çarçeweya kampanyaye de kargehê perwerdeyî dayî destpêkerdiş û wina vat: “Bi na kampanyaye ma do tax bi taxe, keye bi keye bigêrê û kargehê xo pê bîyarê. Ma do xo biresnê heme hemwelatijan. Ma amac kenê ke bi xebatê xo xo biresnê komel û pîya probleman çareser bikerê.”
‘Şer serê bedenê cinîyan de yeno rayîr ra berdiş’
Nevriye ard ziwan ke şerê ke tarîx ra heta nika dewam kenê serê bedenê cinîye de yenê rayîr ra berdiş û vat: “Nika bi şerê Îsraîl-Fîlîstînî, şerê Ukraynaye, şerê Rojawanî virazîyeno. Raştîyêka şerî ya ke bedenê cinîye teşhîr kena û serê tutan ra yena kerdiş esta. Vera nê caardişan de ma do bikewê cehdkerdişî mîyan ke ma heta merheleyêke vernîya nê çîyan bigêrî, vera înan de vinderî û venga hîssgerîye bikerî.” Nevriye sewbîna dîyar kerd ke ê do xebatê xo de bale biancê serê tutan û da zanayîş ke problemê tutan zî rojeva înan de yo.
‘Cinîyê ke tarîx ra heta nika têkoşîn kenê, estê’
Nevriye cinîyê ke tarîx ra heta nika têkoşîn kenê vîr ard û wina vat: “Wexto ke ma tarîxê xo ra ewnîyenê, raştîyêka ma ya sey kulturî ke semedo ke teslîmê dişmenî nêba bedenê xo parçe kena, esta. Sey taqîpkarê nê kulturî ma do kampanyaya xo ya ke bi sloganê ‘Bi jin jiyan azadî reyde ver bi azadîye ra’ dîyabî destpêkerdiş dewam bikerê û bi fehmo ke heta cinî azad nêba komel zî azad nêbeno, ma do têkoşîn û xebata xo dewam bikerê.”
‘Şeran de hedefo yewine cinî yê’
Yasemîn Uçere zî bale ant serê lazimîya rêxistinbîyayîşî û hetgêrî yê hemverê heme probleman û vat: “Seba ke ma seserra 21ine bikerê seserran cinîye ma dest bi na kampanyaye kerd. Bi hedefgirewtişê cinîyan komel zî yeno hedefgirewtiş. Ganî ma hişmendîya cînsîyetî mîyanê heme cinîyan de wedarnê û ganî her kes vera butçeyê şerî ke ameya cîyakerdiş de îtîrazê xo bikero û vengê xo berz bikero. Semedo ke heme argumanê şîdetê komelî vera cinîyan de yenê hadrekerdiş. Coka ra zî ganî cinî timî bi rêxistinkerde mîyanê paştîdayîşî de bê.”
Yasemîne dîyar kerd ke ver bi 25ê Teşrîna Peyêne ra cinî her roje hîna bi hêz bena, rêxistin bena û kewena ferqo ke eşkena problemanê xo çareser bikera. AMED
