Hemserekê Komeleya Hetkarîya Bi Keyeyanê Tepişteyan û Hukmwerdeyan a Çukurova (Çukurova TUHAY-DER) Ergîn Altuntaşî da zanayene ke Zîndanê Ereglî yê Konya de 7 tepişteyê ke cezaya înan qedîyaya, nînan rê ‘poşmanîye’ ameya ferzkerdene.
Altuntaşî pare kerd ke seba ke 7 tepişteyan poşmanîye qebul nêkerda hetê Heyetê Çimdarîye yê Îdareyî ra înfazê înan 6 mengan ameyo taloqkerdene. Altuntaşî ard ziwan ke Heyetê Çimdarîye yê Îdareyî xo ser mehkemeyan vînenê û bire danê.
Goreyê raporanê ÎHDyî 2021 ra nata înfazê tewr tay 313 tepişteyan ameyo vêşnayene ke mîyanê nê tepişteyan de 88 tepişteyê nêweşî est ê.
