Hevseroka Desteya Rêveber a Şengalê Riham Hesen û Endama Komîteya Peywendiyên Derve ya TAJÊ Sûham Şengalî komxebata ‘Jin û Parastin’ weke gaveke girîng a ji bo pêşxistina têgihiştina jin a parastinê nirxandin û gotin: “Eger jin bigihije feraseta xweparastinê, wê bikare civakê jî bi xwe re rêxistin bike û bixe tevgerê. Wê şerê gel ê şoreşgerî bi pêşengiya jinê were berfirehkirin û pêşxistin.”
10’ê mijdarê li Navenda Şengalê bi pêşengiya Tevgera Azadiya Jinên Êzidî (TAJÊ) û bi beşdariya 150 jinên ji pêkhateya êzidî û ereb komxebatek li ser mijara ‘Jin û Parastin’ hat lidarxistin.
Komxebata parastinê ya jin bi armanca pêşxistina feraseta xweparastina ji êrîşên qirkirinê, ferman û tundiya mêr ya sistematîk û bi civakîkirina feraseta parastinê li her qadeke jiyanê de hat lidarxistin.
Komxebat li navenda ku DAIŞ ji aliyê gerîla û şervanan ve hat têkbirin û salvegera 8’emîn a rizgarkirinê de hat lidarxistin. Ji ber vêya coşa rizgarbûna Şengalê ya ji tarîtiyê li ser komxebatê serwer bû.
‘Xeta şerê gel ê şoreşgerî wê bi pêşengiya jinê were rêxistinkirin’
Hevseroka Desteya Rêveber a Şengalê Riham Hesen xebatê û salvegera rizgarkirina Şengalê pîroz kir û kurt vê peyamê da: “Ev komxebat bi pêşengiya TAJÊ û YJŞ’ê hat lidarxistin. Bi beşdariya hemû pêkhateyên li Şengalê yên êzidî û ereb pêkhat. Hemû saziyên Şengalê jî beşdarbûn. Em salvegera rizgarkirina Şengalê li mîmarê azadiyê, şehîdan û çar parçeyên Kurdistanê pîroz dikin. Ne tenê keç û xortên êzidî yên çar parçeyên Kurdistanê jî li vir şehîdbûn. Lê hîn jî êrîş li ser me û pêşengên me dewam dike. Ji ber vêya ev komxebat wê xeta şerê gel ê şoreşgerî bi pêşengiya jin rêxistin û berfireh bike.”
‘Komxebat di demeke girîng de hat lidarxistin’
Endama Komîteya Peywendiyên Derve ya TAJÊ Sûham Şengalî ku di heman demê de komîteya amadekar a komxebatê bû jî têkildarî mijarê de wiha axivî: “Komxebatek der barê jin û parastin de çêbû. Gelek jin tev li vê xebatê bûn. Ev komxebat gelekî girîng bû û di salvegera rizgarkirina Şengalê de çêbû. Di komxebatê de êrîşên DAIŞ’ê û yên dewleta tirk û şerê taybet ê li ser Şengalê tê meşandin jî hat destgirtin.”
‘Eger jin xwe bigihînin feraseta xweparastinê wê civakê jî rêxistin bikin’
Sûham Şengalî di dewama axaftina xwe de wiha got: “Di vê serdemê de lidarxistina komxebatek wisa girîng bû. Di civakan de eger jin xwe bigihînin têgihiştina parastinê, wê bikarin civakê jî bi xwe re rêxistin bikin û parastineke mayînde jî pêşbixin. Ez komxebatê li tevahî şehîdên di oxira parastina Şengalê û rizgarkirina wan de şehîdbûne pîroz dikim. Her wiha li Rêber Apo, li tevahî gel û şervanan pîroz dikim.”
