Hetkarê Wezîrê Karanê Teberî yê verênî yê Misirî Şerîf Şahînî derheqê tecrîdê vera Rayberê Şarê Kurdî Abdullah Ocalanî û hêrişanê îşxalî yê dewleta tirke yê vera Kurdîstanî de ANFyî rê qisey kerd.
Şerîf Şahînî îfade kerd ke tecrîdê Îmraliyî goreyê qanûnan nîyo û vat: ”Dewleta tirke seba ke moralê Abdullah Ocalanî qels bikera, rolê PKKyî qels bikera û rolê Ocalanî yê seba meseleya kurdan qels bikera tedayanê psîkolojîkan ê sey tecrîdî kena. Polîtîkayê tecrîdî warê heqanê merdiman û huqûqê mîyanneteweyîyî de çin ê. Heqê Ocalanî yê bingeyînî yenê binpaykerdene. Heq nîyo ke Ocalan hucreyê yewkesî de tepişîyeno. No beno sebebê zerarê psîkolojîkî.”
Şerîf Şahînî hêrişê dewleta tirke yê vera Rojawanê Kurdîstanî ercnayî û vat: ”Tirkîya herême de wayîra rolêkê aktîfî ya. Nê rolê xo de vera kurdan bi peymananê ereban warê xo yê manevrayan hîra kena. Meseleya kurdan û meseleya Filîstînî girêdayeyê yewbînan ê. Her hêrişo ke zerar dano dewaya kurdan esas de zerar dano dewaya Filîstînî zî.”
Şahînî pare kerd ke dewleta tirke bi tecrîdê Îmraliyî kena ke fikran û felsefeya Abdullah Ocalanî asteng bikera û vat: ”No mumkîn nîyo. Çunke fikr û felsefeya Ocalanî nuşte yê. Kitabê ey vilayê pêro dinya bîyî. Ganî meseleya kurdan hînî bêra çareserkerdene. Anqara paştî dana filîstînijan la meseleya kurdan peygoş kena. Na nakokîye bi nê hawayî çareser nêbena. Heta nika bi zulmî qet yew mesele nêameya çareserkerdene. Eqsê ci bi zulmî meseleyî giran û vila bîyî.” QAHÎRE
