Komeleya Mafên Mirovan (ÎHD) daxuyaniyên xwe yên piştevaniyê ku her hefte ji bo Dayikên/Mirovên Şemiyê yên dihatin astengkirin ku li Qada Galatasarayê daxuyaniyê bidin li dar dixin, vê hefte jî domandin. Di daxuyaniyên li gelek bajaran hatin dayîn aqûbeta Nîhat Aydogan ê 39 salî ku di sala 1994’an de li gundê Mizîzex yê girêdayî navçeya Midyad a Mêrdînê di bin çavan de hate windakirin û careke din agahî jê nehate wergirtin hate pirsîn.
Şaxa Komeleya Mafê Mirovan (ÎHD) a Şirnexê li Kolana Hunerê ya navçeya Cizîrê daxuyanî da çapemeniyê. Di daxuyaniyê de pankarta, “Bila winda bên dîtîn û faîl hesab bidin” hate vekirin. Endam û rêveberên KESK’ê, Komeleya Ziman û Çand a Birca Belek, OHD’ê beşdarî daxuyaniyê bûn.
Daxuyanî ji aliyê Hevserokê ÎHD’a Şirnexê Haşim Togûrlû ve hat xwendin. Togûrlû diyar kir ku heta kujer bên dîtin ew ê lêgerîna xwe ya heqîqetê bidomînin û got: “Di hefteya 973’yemîn a çalakiya Dayikên Şemiyê de em careke din dibêjin, çend sal derbas bibin jî em ê dev ji daxwaza edaletê ya ji bo Nîhat Aydogan û hemû windahiyên xwe bernedin. Em ê dev ji daxwaza darizandin û cezakirina kiryaran bernedin.”
Şaxên ÎHD’ê yên Enqere, Edene, Mêrsîn, Antalya û Îzmîrê jî daxuyanî dan û xwestin faîlên Akdogan bên dîtin û derbarê wan de lêpirsîneke bi bandor bê meşandin.
