Dewleta tirke ronîyayîşê xo ra nata armanc kena ke çar parçeyanê Kurdîstanî zî îşxal bikera. Rejîmê Baasî yê Sûrîye bi projeyê ‘Kemberê Ereban’ Rojawan de xîret kerd ke şarê kurdî yewbînan ra cîya bikero. Rejîmê Baasî yê Iraqî heman polîtîka vera şarê Başûrî kerde. Vakur de zî bi operasyonanê qirkerdişan kurdî dîyayî koçkerdene.
Cografyaya Kurdîstanî sey polîtîkayêka îşxalî binê ablûqaya dewletan de ya. Başûrê Kurdîstan de zî bi serran o hetê PDKyî ra hêzê leşkerî yê dewleta tirke ya îşxalkere yenê cakerdene û şarê herême dîyeno koçkerdene.
Dewleta tirke ya îşxalkere seba ke qirkerdişê kurdan temam bikera 8 serranê peyênan de hêrişê xo yê îmhakerdişî zêdînayî. Dewleta tirke nika plan kena ke Vakurê Kurdîstanî ra heta sînorê Rojhelatê Kurdîstanî herêmêka tampone awan bikera. Mabênê nê sînoran de dêsê berzî virazîyayî ke herêma tampone 30 kîlometre şora zereyî. Gerîlayan bi xoverdayîşê xo hêrişê nê planî pûç kerdî la dewleta îşxalkere bi destê PDKyî xo resnena waranê gerîlayan. Nê 3 serranê peyênan de hêzê PDKyî bi xo serkêşîya leşkeranê tirkan kenê û nînan benê waranê gerîlayan. PDKyî seba artêşa tirke ya îşxalkere bi desan baregehî awan kerdî û şar wareyanê ci ra kerd. Bi taybetî dewê nêzdîyê waranê gerîlayan ameyî hedefkerdene.
Başûr de hêrişanê dewleta tirke de qasê 100 sivîlî şehîd bîyî, bi seyan dewî ameyî vengkerdene, herêmî sivîlan rê ameyî qedexekerdene. Qedexeyanê PDKyî ra şar nêeşkeno heywankarîye û zîretî bikero ke xo bidevirno. Şar naye ra beno xizan û neçare maneno ke koçê teberê welatî bikero. Na koçberîye de zî xeylêk kesî dinyaya xo bedilnenê. Hetêkî ra zî PDK û keyeyê Barzanîyan erdê Başûrî pêşkêşê dewleta tirke kenê, bi nê hawayî benê zengînêr.
Dewleta tirke bi taybetî 2 serranê peyênan de bi destê PDKyî xeylêk herêmî dayî xalîkerdene û xîret kena ke Behdînanî ra heta Biradostî herêmêka tampone awan bikera. Xeta Amedîyê de xeylêk baregehî virazîyayî. Herêma Balekayetî de zî xeylêk baregehî ronîyayî. Dewleta îşxalkere herêma Mehmûdîye ya mabênê Zaxo û Batûfa û sînoranê Rojawanî de noqtayê neweyî yê baregehî awan kerdî ke na herêma tampone hîra bikera. Bi nê hawayî dewleta îşxalkere do hêrişanê xo yê vera Rojawanî zî bizêdîna. Êyê ke vera nê îşxalî vejîyenê bi îstîxbaratê PDKyî hetê MÎTî ra kişîyenê.
Nika bi ablûqaya Herêmanê Pawitişî yê Medya erdê Başûrî de baregehê neweyî ronîyayî. Herêmanê binê kontrolê PDKyî de seba teyarayanê şerî yê dewleta îşxalkere pîstî zî virazîyayî. Sewqîyatê leşkeran nê pîstan ra vera bi herêmanê gerîlayan yenê kerdene. Nê tabloyî ra aseno ke PDK teyna seba têkoşînê gerîlayan zerar nîyo, şarê Başûrî zî qurbanê îşxalê tirkan keno. Coka zaf girîng o ke şarê Başûrî beşdarê têkoşînê azadîye bibo. BEHDÎNAN
