Tê payîn ku Qeter îro hejmareke din a dîlgirtiyên ku bên berdan ragihîne. Dethislata Îsraîlê jî got wan lîsteya navên ku dê ji Xezayê derkevin wergirtiye, lê belê hejmar an dema berdana wan diyar nekir.
Berdevkê artêşa Îsraîlê Doron Spielman got: “Hê jî nêzî 215 dîlgirtî li Xezayê hene. Em nizanin sax an mirî ne.”
Qeter ku navbeynkarê sereke yê navbera Hemas û Îsraîlê ye, tevî Misir û DYA`yê gihîşt lihevkirina agirbestê ya ku dê 4 rojan dewam bike û dibe ku were dirêjkirin. Li gorî lihevkirinê, dê 50 dîlgirtiyên li Xezayê li beramberî 150 esîrên filistînî bên berdan.
Roja înê (24 mijdar) Hemasê 24 dîlgirtî (13 îsraîlî, 10 taylandî û welatiyekî Fîlîpînê) bi rêya Misirê radestî Îsraîlê kirin. Ji aliyê xwe ve, Îsraîlê 39 filîstînî berdan. Desteya Dîlgirtî û Kesên Rizgarkirî ya Filistînê duh piştî nîvro lîsteya bi 39 navên esîrên filistînî (15 xort, 24 jin) parve kiribû.
Serokê Amerîkayê Joe Biden berdana koman yekemîn a dîlgirtiyên li cem Hemasê wekî “destpêkekê” bi nav kir û got ku şensa dirêjkirina agirbesta 4 rojan a li Xezayê heye.
Li gorî artêşa Îsraîlê, ji dema destpêkirina şer (7 cotmehê) ve tevgera Hemasê 240 kes dîl girtine.
Li gorî daneyên Wezareta Tenduristiyê ya Filistînê, ji dema destpêkirina şerê Hemas-Îsraîlê ve, hezar û 200 îsraîlî hatine kuştin, her wiha 14 hezar hezar û 854 filistînî ku 6 hezar û 150 ji wan zarok bûn hatine kuştin û 36 hezar jî birîndar bûne. Li gorî Neteweyên Yekbûyî (NY), zêdetirî nîvê xaniyên li Xezayê hatine rûxandin an zirar dîtine û 1.7 milyon kes ji warê xwe bûne.
Tê destnîşankirin ku duh 200 kamyonên alîkariyan gihîştin Xezayê.
