Gerîlayên Azadiya Kurdsitanê her roj bi taktîkên dewlemend derbên giran li dewleta tirk a dagirker dixin. Gerîlayên azadiyê di sala 46’an a PKK’ê de axivîn. Gerîla Şerzan Hawar anî ziman ku armanca wan pêkanîna armancên şehîdan e û wiha domand: “PKK di demeke wiha de ku hêviya gelê kurd hatibû şikandin bi wezîfeyeke dîrokî dest bi têkoşînê kir. Li gel êşkenceyên dewleta tirk jî kadroyên PKK’ê li zindana Amedê berxwedaneke dîrokî û mezin nîşan dan. Hevalê Kemal Pîr piştî ku kete rojiya mirinê û hat dadgehê ji hevrêyên xwe re got, ‘Em bi ser ketin, îro bi 6 kesan. Sibê em ê bibin bi hezaran kes û xwe bigihînin bi milyonan mirovî’. Îro kurd, ereb, suryanî û enternasyonalîst bi hezaran şervan mil bi mil têdikoşin. Ev yek jî moraleke mezin dide me. Şoreşa Rojava di heman demê de nîşaneya armanca şehîdên me ye. Bêguman vê şoreşê bandor li civaka me jî kiriye. Gelê kurd, jin, ciwan zane bûn, xwe bi rêxistin kirin û tevlî her qada vê şoreşê bûn.”
Hawar destnîşan kir ku di vê dema dîrokî de ji bo berxwedan bi ser bikeve pêwîstî bi piştgiriyeke xurt heye û wiha dawî li axaftina xwe anî: “Di demeke bi vî rengî de divê her kes rabe ser piyan, bi rol û mîsyona xwe rabe. Bila kes nebêje tiştek ji destê min nayê. Wezîfeyên girîng bi taybetî dibin para jin û ciwanan. Divê em hemû berpirsyariyên xwe bi cih bînin. Weke neviyên Seyîd Riza û Şêx Seîd em ê rol û mîsyona xwe bi cih bînin.”
