Temsîlkaranê Têgêrayîşê Potere al Popoloyî yê Îtalya ra Maurizio Coppolayo ke tewrê Akademîya Modernîteya Demokratîke bi, ANFyî rê qisey kerd.
Maurizio Coppolayî bale ante muhîmîya konferansî ser û nê vatî: ”Nê konferansî rê tewrbîyayîşo mîyanneteweyî ame kerdene. Raştîye cîyayî, rêxistinê sîyasî û komelkî yê cîyayî tewrê konferansî bîyî. Rêxistinanê sîyasîyan ê cîya cîyayan fîkrê xo pare kerdî ke no verê têkoşînê hemparî akeno. Perspektîfê dinya senî do bêro bedilnayene ameyî destgirewtene. Konferansê winayênî yê ke fîkranê cîya cîyayan anê têhet, muhîm ê. Coka semedê ma Îtalya ra tewrbîyayîşê nê konferansî muhîm bi.”
Maurizio Coppolayî vist vîrî ke merkezê konferansî de paradîgmaya Rayberê Şarê Kurdî Abdullah Ocalanî ca girewt û nê vatî: ”Ma mîyanê rêxistina xo de û pîya bi hemrayanê xo metînê ke hetê Abdullah Ocalanî ra ameyî nuştene, wendî ke açarîyayî îtalyankî û ziwananê bînan. Nê metîn û paradîgmaya Ocalanî ma rê bîyî çimeyê îlhamî. Şarê kurdî vera zextanê emperyalîstan têkoşîn keno. Ma xeyrê fîkranê Ocalanî fîkranê xo newe kenê.
Ma demokrasîyî pawenê û azadîya Ocalanî wazenê. Coka kampanyaya ‘Abdullah Ocalanî rê azadîye meseleya kurdan rê çareserîya sîyasîye’ semedê ma zî muhîm a. Îtalya çeke roşena Tirkîya û pê nê çekan kurdî yenê kiştene. Nê semedî ra dişmenê ma est o ke ma do pîya vera ci têkoşîn bikerê. Waştişê azadîya Ocalanî leteyêkê têkoşînê ma yo. Coka ma paştî danê kampanya û kenê ke komelê Îtalya û Ewropa tewrê kampanya bibo.” BASEL
