Avûkate Selma Benkhelifa derheqê babete de ANFyî rê qisey kerd.
Avûkate Selma da zanayene ke wexto ke ê şîbî Mexmûr û Şingalî droneyî serê înan de gêrayêne. Avûkate Selma Benkhelifa vat: ”Êzidîyanê Şingalî hêrişê droneyê dewleta tirke sey hêrişanê DAÎŞî û sey fermanî pênas kerdêne. Ma dî ke dewleta tirke binê nameyê ‘têkoşînê vera PKKyî de hêrişê herême kena. Ma Şingal de mexdûran, esnafan û şarî de qisey kerd. Xora Şingal de bi seyan sivîlî bi droneyan kişîyayê.
Dima ma şîyî Kampa Multecîyan a Mexmûrî. Roniştoxê Mexmûrî zulmê dewleta tirke ra remayê. La ancî zî na kampe bena hedefê hêrişanê droneyan. Goreyê dewleta tirke Kampa Mexmûrî ‘kampa PKKyî’ ya. Ne Mexmûrî ra ne zî Şingalî ra vera dewleta tirke hêrişêk zî nêameyo kerdene. Goreyê qanûnanê mîyanneteweyîyan sûc o ke dewleta tirke teberê sînoranê xo de wina hêriş bikera.”
Avûkate Selma Benkhelifa bale ante ser ke dewleta tirke serranê 80 û 90an de merdimî remnayêne û kiştene û vat: ”Nika zî dewleta tirke bi hawayêkê bêhukmî bi droneyan kurdan qetil kena. Dewleta tirke droneyan sey hacetê kiştişî şuxilnena. MÎT kurdan ser o agahîyan arê dano û komputeran ser o nê merdiman kişeno. Kam beno wa bibo dewletêke nêeşkena merdimêkî bê muhakemekerdişî, bê hukmî bikişa. MÎT mehkeme nîyo.”
Avûkate Selma Benkhelifa pê hesna ke ê netîceyanê cigêrayîşanê xo ser o muracatê Mehkemeya Heqanê Merdiman bikerê. Selma vat: ”Tirkîya de yew qanûn est o; çew nêeşkeno vera MÎTî dewa abikero. Coka ganî muracatê Neteweyanê Yewbîyayeyan bêro kerdene. Seba mexdûranê Mexmûrî ma muracatê Komîsyonê Heqanê Merdiman ê Neteweyanê Yewbîyayeyan kerd. La hema zî cewab nêdîya ma.” BRUKSEL
