Serekê verênî yê Komîteya Vergirewtişê Îşkenceyî (CPT) Mauro Palmayî Medya Haber TV de cewab da persanê Serkan Demîrelî û derheqê tecrîdê vera Rayberê Şarê Kurdî Abdullah Ocalanî de qisey kerd.
Prof. Mauro Palma Unîversîteya Roma Tree de dersanê huqûqî û heqanê merdiman dano. Ey mabênê serranê 2007-2011î de serekîya CPTyî kerdbî.
Prof. Mauro Palmayo ke Zîndanê Îmraliyî hîrê reyî zîyaret kerdbî, hêverî qala şertanê Îmraliyî kerde û vat: ”Ewropa de sey Îmraliyî zîndanêko bîn çin o. Hêverî teyna Abdullah Ocalan uca de tepişte bi. Nika Îmrali de Abdullah Ocalan reyde 4 tepişteyî est ê. La ancî zî rewşa Îmraliyî ya îstîsnayîye dewam kena. Keye û avûkatê tepişteyanê Îmraliyî nêeşkenê pêvînayîş bikerê. Lokasyonê Îmraliyî bi xo mesele ya. Îmrali werteyê dengizî de yo. Ez bi xo tim pê teyara şîya uca. Nê pêro şertî benê sebebê îzolasyonî ke hetê Konseya Ewropa ra ganî nêrê qebulkerdene. Abdullah Ocalan û tepişteyê bînî îzolekerde yê û yewbînan nêvînenê. No zî yeno manaya binpaykerdişê heqê sosyalbîyayîşî.”
Prof. Palmayî bale ante zîyaretanê xo yê Îmraliyî ser û vat: ”Mi dî ke Abdullah Ocalan mîyanê tecrîdêkê mutleqî de yo, kontrolê ci yê weşîye nênê kerdene û personelanê zîndanî qetî ey de qisey nêkerdêne. 2012 de reya peyêne ez şîya Îmraliyî. O çax televîzyonê ci çin bi. Televîzyonê tepişteyanê bînan est bîyî. Ocalan de teyna radyoyêk est bi ke tede teyna yew kanal est bi.”
Prof. Mauro Palmayî îfade kerd ke ganî CPT û Konseya Ewropa vera tecrîdî tewirêkê zelalî bimojnê û vat: ”Abdullah Ocalan seba çareserîya meseleya kurdan aktorêko girîng o. La tecrîdî ra nêeşkeno rolê xo bîyaro ca. 2008 de îdîaya ‘Ocalan ameyo jehrîkerdene’ kewtbî rojdem. O çax CPTyî na îdîa ser o cigêrayîşê hîrayî kerdbî. CPT herinda ke rewşanê birîskan ser de vindero ganî vera tecrîdî gamanê bitesîran bierzo. Ganî CPT babeta Ocalanî de hîna aktîfî têbigêro.”
Palmayî dîyar kerd ke şertê Îmraliyî goreyê rûmetê merdimatîye nîyê û vat: ”Şertê Îmraliyî merdiman qij kenê, rûmetê merdiman binpay kenê.”
Palmayî pare kerd ke o azadîya Rayberê Şarê Kurdî wazeno û vat: ”Goreyê mi Ocalan temsîlkarê raştîyêke yo. Ganî Ocalan azad bibo û bieşko fikranê xo îfade bikero.” ROMA
