Hetkarê Serekîya Pêroyî ya Çepa Ewropa, Sekreterê Partîya Komunîste ya Fransa û Hetkarê Serekîya Şaredarîya Herêma 13. ya Parisî Vincent Bouletî derheqê tecrîdê Îmraliyî û hêrişanê dewleta tirke yê vera kurdan de ANFyî rê qisey kerd.
Vincent Bouletî bale ante Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ ser û vat: ”Ganî na hemle bêra pîlkerdene. Abdullah Ocalan û sîyasetmedarê kurdî yê tepişteyî temsîlkarîya têkoşînê azadîye kenê. Tecrîdê Îmraliyî yê rejîmê AKPyî heqanê tepişteyan binpay keno. Ez paştî dana Hemleya Azadîye. Ganî na hemle bêra hîrakerdene û bikewa rojdemê hukmatanê Ewropa. Azadîya Abdullah Ocalanî do seba çareserîya meseleya kurdan biba gamêka bêhempa. No waştiş teyna seba şarê kurdî ney seba şaranê dinya zî girîng o û ganî bêro pîlkerdene.”
Vincent Bouletî bêvengîya Ewropa ya vera tecrîdê serê Abdullah Ocalanî renxe kerde û vat: ”Na bêvengîye seba Ewropa skandalêk o. Seba ke na polîtîka bivurîya, demokrasî bêra caardene û Abdullah Ocalan vera bidîyo ganî Ewropa tedaya dewleta tirke bikera.”
Sîyasetmedar Vincent Bouletî qala hêrişanê dewleta tirke yê vera Rojawanî û şarê kurdî kerde û vat: ”Hêrişê vera Rojawanî sûcê şerî yê. Ganî qetî nê hêrişî bêrê şermezakerdene. Rejîmê Erdoganî seba asayîşê herême tehlukeyêko pîl o û seba şaranê Tirkîya gef o. Erdogan seba asayîşê Ewropa zî tehluke yo. Ganî Ewropa goreyê ney têbigêra û verê Erdoganî bigêra.” BRUKSEL
