Zîndanê Cinîyan ê Tarsusî de zî cinîyê tepişteyî grevê vêşanîye de yê.

Cinîyan zîndanî ra mesajê xo şawit û vat: ”Ma serra 46. ya ronîyayîşê partîya ma fîraz kenê. Nê prosesî de Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ de dîyaye destpêkerdene ke na hemle zaf girîng a. Çunke tecrîdê Zîndanê Îmraliyî vilayê pêro zîndanan û waranê cuye bîyo. Dewlete wina ferz kena ke ma cuya bê Rayberîye qebul bikera. Wa her kes bizano ke ma do qetî na rewşe qebul nêkerê û heta peynî xoverdayîşî ferz bikerê.

Bi Tecrîdê Îmraliyî yeno waştene ke şarê kurdî bênefes bimano. Êyê ke wazenê her ca bikerê sey Îmraliyî wa bizanê ke ma zî do xeta xoverdayîşê Îmraliyî de her ca bivurnê warê xoverdayîşî. Çunke ma xoverdayîşê Îmraliyî ra îlham gênê.

Nê esasî ser o ma do bi qerardarî tewrê nê grevê vêşanîye bibê. Vera tecrîdê serê Rayber Apoyî, seba veradîyayîşê embazanê ma yê nêweşan, vera vêşnayîşê înfazan ma tewirê xo do eşkera bikerê. Ma venga şarê xo û keyeyanê xo danê ke nê xoverdayîşê ma pîl bikerê û sereyê xo wedarnê.”