Edîtorê beşa erebî ya ajansa Rojnewsê Silêman Ehmed roja 1’ê Cotmehê ji bo serdanê çûbû cem malbata xwe ya li taxa Şêx Meqsûd ya Helebê. Silêman roja 25’ê Cotmehê dema xwest di ser deriyê Sêmalka re derbasî Başûr bibe, ji aliyê hêzên PDK’ê ve hat revandin û ev 58 rojin agahî jê nayê girtin. Her ku diçe guman û fikarên li ser jiyana Silêman Ehmed zêde dibin. PDK rê nade ne parêzer, ne jî malbat û kesek hevdîtinê li gel bike. PDK ji ewlehî û jiyana edîtorê Rojnewsê Silêman Ehmed berpirse.
Bi revandina Rojnameger Silêman Ehmed re bertekên rojnameger, kesayetên siyasî, partî, rêxistinên mafên mirovan û rêkxistinên parastina mafên rojnamegeran li navxweyî û derve zêde bûn. Rojnameger Peyman Emîn têkildarî revandina rojnameger Silêman Ehmed de axivî. Rojnameger Peyman diyar kir ku desthilata Herêma Kurdistanê bi rêya revandin û qetilkirina rojnamegeran hewl dide ji rojnamegeran re dibêje ku xwe tevlî tu dozan nekin û wiha got: “Li Herêma Kurdistanê azadiya ramanê û azadiya rojnamegeriyê gelekî teng e. Qanûna rojnamegeriyê tenê li ser kaxizê hatiye nivîsandin û neketiye meriyetê, bikar nayê. Berovajiyê vê yekê jî li derveyî welat rayedar banga azadiya ramanê û azadiya rojnamegeriyê li desthilatê dikin.”
