23yê kanûna 2022yî de paytextê Fransa Paris de hêrişê çekdarî yê vera Merkezê Kulturê Kurdan ê Ahmet Kayayî de Evîn Goyî, Mîr Perwer û Abdurrahman Kizil ameyî qetilkerdene. Koordînasyonê KJKyî bi wesîleya serrgêra yewine ya qirkerdişî mesajêk weşana.
Mesajê KJKyî wina yo:
”23yê kanûna 2022yî de paytextê Fransa Paris de hetê têtikkêşê dewleta tirke yê bi nameyê Willamî ra hêrişê Merkezê Kulturê Kurdan ame kerdene û embaza ma û kadroya serkêşe ya têgêrayîşê cinîyan ê kurdan Evîn Goyî (Emîne Kara), hunermend Mîr Perwer û welatperwer Abdurrahman Kizil hêriş de şehîd bîyî. Ma şexsê înan de pêro şehîdanê xo bi rêzî yad kenê. Ma soz danê ke xeyalê şehîdanê ma Kurdîstanê azad û demokratîkî awan bikerê.
Sey cinîyan ê kurdan ma her çaxî de vera serdestîya camêrdan û kolonyalîstan xo ver da. Herêma Botanî de no xoverdayîş tim asta tewr berze de bi. Embaza ma Evîn Goyî mîyanê tradîsyonê xoverdayîşî yê Botanî de bîya pîl û aye 32 serrê xo dayî şorişê Kurdîstanî û cinîyan. Embaza ma Evîn Goyî bêteredut her ca de têkoşîn kerdi Rayber Apoyî ra perwerde girewt û serkêşîya artêşbîyayîşê cinîyan kerd. Ewro xêrê ked û mîrasê aye ra koyanê Kurdîstanî de gerîlayê YJA-Starî serkêşîya xoverdayîşî kenê, vera dişmenî bi hawayêkê bêemanî şer kenê. Embaze Evîne tim xo bi îdeolojîya azadîye kerd de, aver berd û bi felsefeya ‘yew loqma, yew xirka’ ciwîyaye. Embaze Evîne Rojawan de vera cerganê DAIŞî şerê rûmetênî de tewr vernî de cagirewt, zereyê şorişî de şorişêk kerd û serkêşîya ci kerde ke Şorişê Rojawanî wa bibo şorişê cinîyan.
Embaz Mîr Perwero ke Qirkerdişê 23yê Kanûne de şehîd bîyo Ewropa de xebatê kulturelî kerdêne,, seba ziwan û hunerê kurdan têkoşîn kerdêne. Embaz Abdurrahman Kizilî zî Ewropa de tim mîyanê têkoşînî de cagirewt, erjê welatperwerîye pawitî û temsîl keerdî. Embaz Abdurrahmanî tim xeyal kerdêne ke rojêke do abigêro Kurdîstanî. Dewleta tirke şexsê nê wird merdimanê ma de kultur û welatperwerîya kurdan kerde hedef.
Îqtîdarê AKP-MHPyî yo faşîsto ke serkêşîya eqlê camêrdan ê hegemonî keno, xebata azadîya cinîyan a ke Rayber Apoyî seba ci vatêne ‘xebata min a tewr ercîyaye ya’ keno hedefê qirkerdişanê xo. Nê wextî de ke her cayê dinya ra şîarê ‘Jin, Jiyan, Azadî’ beno berz dewleta tirke no qirkerdiş kerd. Dewleta tirke bi hedefkerdişê kadro û endamanê têgêrayîşê azadîye yê cinîyan pêro cinîyan ê kurdan û şarê ma kena hedef. Dewleta tirke bi nê hawayî armanc kena ke çimê ma bitersna û ma bê têkoşînî war verda.
Fermanê nê qirkerdişî hetê Şefê Faşîstî Erdoganî ra ame dayene, hetê MÎT û Hakan Fîdanî ra qirkerdiş ame caardene û Williamî rê erkê têtikkêşîye ame dayene. Tarîxî ancî mojna ke Ewropaya ke qala edalet, heqanê merdiman, têdûştîye ûsn. kena wexto ke babete yena kurdan ser qetî nê erjan nêana ca. Dewleta Fransa rixmo ke Qirkerdişê Parisî yê 9ê Çeleyê 2013î des serrî xo pey de verdayî qirkerdiş roşnî nêkerd û bi nê hawayî bîya hemkara Qirkerdişê Parisî yê Diyînî zî. Heta ke dewleta Fransa nê qirkerdişan roşnî nêkerda nameyê ci sey hemkara qirkerdişan do tarîx de binusîyo.
Ma sey embazanê aye yê têkoşînî meşaleya cuya azade ya Evînan do tim berz bikerê û venga pêro cinîyan danê ke wayîrê vîrameyîşanê nê cinîyan ê ercîyayeyan vejîyê. Perwerîya raştikêne bi caardişê xeyalanê nê cinîyan mumkîn a. Cinîyê kurdî wa her ca de xo rêxistin bikerê, seba caardişê paradîgmaya ekolojîke, demokratîke û azadîgîra cinîyan bixebitê. Ancax bi nê hewayî ma eşkenê komploger û kiştoxan ra hesab bipersê. Teyna 23yê kanûne de ney heta ke kiştoxî hesab bidê pêro şarê ma, cinî û ciwanî wa Ewropa, Vakur, Başûr, Rojhelat û Rojawanê Kurdîstanî de payan ser de bibê û têkoşînî pîlêr bikerê.” BEHDÎNAN
