Serokê Giştî yê Civaka Îslamî ya Kurdistanê (CÎK) Hafiz Ahmet Tûrhalli bi peyameke dîtbarî êrîşên dewleta tirk ên li ser Rojava şermezar kir. Tûrhalli got ku dewleta tirk qadên sivîlan bomberan dike û wiha axivî: “Dewleta tirk ji aliyekî ve êrîşên Îsraîlê yên li ser Xezeyê dike rojev. Li aliyê din jî bi rengekî giran bombeyan li gelê kurd ê li Rojava dibarîne. Mirovên sivîl qetil dike. Êrîşî saziyên cemaweriyê, nexweşxane û saziyên binesaziyê dike û sûcê şer dike.”
‘Ji destê me çi tê divê em wê bikin’
Tûrhalli di dawiya peyamê de ev bang kir: “Ji destê kê çi tê bila bike. Divê em van zaliman rawestînin. Li cihê ku zilm hebe îslamiyet û mirovahî nîne. Eger em îro li ber êrîşên li ser Rojava ranebin ji êrîşan em ê hemû berpirsyar bin. Lewma divê em li ber vê zilmê rabin. Ji destê me çi tê divê em wê bikin. Dewleta Tirk ji doh bi şev ve bombeyan li Rojava dibarîne. Sedem çi ye? Li başûrê Kurdistanê li hemberî şervanên azadiyê têk çûn. Tola vê yekê ji mirovên sivîl hiltînin. Qadên jiyanê yên mirovên sivîl tune dikin. Êrîşî nexweşxane, sîloyên genim û saziyên xizmetê dikin. Ev yek sûcê li dijî mirovahiyê ye. Li hemberî van zaliman em dengê xwe bilind bikin. Bila her kes li ber van zaliman rabin.”
