Hemserekîya Konseya Rayberdişî ya KCKyî bi wesîleya serrgêra Qirkerdişê Roboskî mesajêk weşana.
Mesaj wina yo:
”Dewleta tirke ya kolonyalîste 28ê kanûna 2011î de hêrişê 34 kurdanê ke zafê ci doman bîyê kerd. Netîceya bombardumanî de 34 kurdî ameyî qetilkerdene. No qirkerdişo ke tede dewijê Roboskî ameybî kiştene bi nameyê ‘Qirkerdişê Roboskî’ sey xeylêk qirkerdişanê vera kurdan derbazê tarîxî bi. Ma nê qirkerdişê namerdî ancî bi hêrsê pîlî şermezar kenê, şexsê qurbananê ci de pêro şehîdan bi hûrmet û minetî yad kenê û sozê xo yê seba şehîdan dibare kenê.
Rixmo ke Qirkerdişê Roboskî 13 serrî xo pey de verdayî sey qirkerdişanê bînan ame mîyankerdene. Mesuldaranê nê qirkerdişî ra hesab nêpersîya û mesuldarê ci ameyî pawitene. Seke zanîyeno şefê faşîstî Erdogano ke fermanê Qirkerdişê Roboskî dabî, bi wayîrvejîyayîşê nê qirkerdişî hem rolê xo yê qirkerdişî hem zî nêzdîbîyayîşê dewleta tirke nîşan da. Qirkerdişê Roboskî û pêro qirkerdişê vera kurdan çarçewa planê dewleta tirke yê vera kurdan de yenê kerdene. Ewro zî na polîtîkaya qirkerdişê kurdan dewam kena.
Bi wesîleya serrgêra 13. ya Qirkerdişê Roboskî ma wazenê ke ancî bale biancê na raştîye ser; dewleta qirkere ra wa caardişê edaletî nêro hêvîkerdene. Oyo ke do edaletî bîyaro ca û hesab biperso têkoşînê şaran o. Şarê kurdî zî nika ra pey ganî nê têkoşînê xo pîlêr bikero, azadîya xo bîyaro ca û bi nê hawayî hesabê qirkerdişan û kolonyalîzmî biprso. Şarê kurdî do azadîye qetî bîyaro ca û hesabê pêro qirkerdişan biperso. Ganî ma têkoşînê xo yê azadîye hîna pîl bikerê û nê sozê xo bîyarê ca. Nê esasî ser o seba ke hesabê Qirkerdişê Roboskî û pêro qirkerdişan bêro persayene ma venga her kesî danê ke têkoşînî hîna pîl bikerê û hîna zaf têkoşîn bikerê.”
