Koordînasyonê KJKyî bi eşkerayîyêke hêrişê îşxalî yê dewleta tirke yê vera şarê Kurdîstanî şermezar kerdî.
Eşkerayîye wina ya:
”Ma hêrişanê îqtîdarê AKP-MHPyî yê faşîstî û cerganê ci yê vera Rojawanî bi nefretî şermezar kenê. Ma şehîdanê nê hêrişan bi minetî yad kenê û birîndaran rê şîfaya xeyrîne wazenê. Ancî ma gerîlayanê ke Operasyonê Şorişgêrî yê 22-23yê kanûne de şehîd bîyê bi rêzî û minetî yad kenê. Ma pêro şerwananê HPG û YJA-Starî yê ke bi xoverdayîşê xo hêz danê şarê ma fîraz kenê.
Rejîmê AKP-MHPyî yo ke destpêkê îqtîdarê xo ra nata teyna şerî, xizanîye, dizdîye, talan, qirkerdiş û krîzî ber ardê keno ke nê krîzanê rejîmê xo bi geşkerdişê faşîzmî binimno. Artêşa tirke ya îşxalkere 22yê kanûne de Herêmanê Pawitişî yê Medya de reyna gerîlayan ra derbê giranî werdî. Dewleta tirke ya faşîste seba ke nê binkewtişê xo mîyan bikera hêrişê Rojawanî kerd û vika verê çimanê pêro dinya de sûcanê şerî kena. No şero ke qetî faydeyê şaranê Tirkîya nêkeno teyna seba menfaetanê îqtîdarî dîyeno dewamkerdene. Dewleta faşîste bi geşkerdişê şerî kena ke erjanê şaran û komelî çin bikera û şar û komelî bêîrade bikera. Ganî nê prosesî de hêzê şorişgêr, çepgîr û demokratîkî nê faşîzmî rê vajê ke bes o. Ma venga pêro demokrat, çepgîr, roşnvîr û cinîyan danê ke vera polîtîkayanê şerî yê nê rejîmî tewir bigêrê. Ganî her kes vera hêrişanê qirkerdişan ê serê kurdan hîna zaf têkoşîn bikerê. Wa çew xo vîr a mekero ke na nîjadperestîya vera kurdan sebeba xizanî, bêkarî û mergan a.
Hetê bînî ra şexsê tecrîdê vera Rayber Apoyî de yeno waştene ke wa cinî û hêzê demokrasî û azadîye bihêz nêbê. Şexsê nê tecrîdî de têgêrayîşê azadîye yê cinîyan û Kurdîstanî zî yenê tecrîdkerdene. Tecrîdê Îmraliyî reyde çar parçeyanê Kurdîstanî de vera cinîyan û şarê ma hêrişê tasfîye û tecrîdî yenê kerdene. Seba ke verê vilabîyayîşê tecrîdê Îmraliyî bêro girewtene ganî xoverdayîşo topyekûn bêro pîlkerdene. Ma sey KJKyî grevê vêşanîye yê zîndanan ê vera tecrîdî selam kenê. Ganî ma sey têgêrayîşê cinîyan vera hêrişanê serê Rojawanî û Kurdîstanî û vera tecrîdî hîna bi aktîfî mîyanê têkoşînî de cabigêrê. Ma venga pêro cinîyan danê ke seba ke verê nê hêrişan bigêrê heqanê xo yê meşrûyan bişuxilnê û vejîyê waran. Heta ke faşîzm bêro rijnayene ganî çalakîyê demokratîkî dewam bikerê. Roja a roj a ke ma dormeyê xoverdayîşê Rojawanî û zîndanan de bêrê pêser, têkoşînê hemparî pîlêr bikerê û destkewteyanê Rojawanî bipawê. Ma venga şarê xo û cinîyan danê ke her cade seba ke destkewteyanê Rojawanî bipawê têkoşînê rêxistinkerdeyî pîlêr bikerê.
Ewro nê hêrişî verê çimanê pêro dinya de yenê kerdene û dewleta tirke ya faşîste bêvengîya dinya ra cesaret gêna. Ma venga pêro hêzanê mîyanneteweyîyan danê ke verê nê hêrişan bigêrê û verê dewleta tirke de tewir bigêrê. Ewro kurdî her cayî ra raştê hêrişan yenê, merdimê ma yenê qetilkerdene û çimeyê ma yê cuye yenê çinkerdene. Rejîmê dewleta tirke kena ke çîyo ke DAIŞî nêmcet verdabi temam bikero.
Bêvengîye zî îqtîdarî payan ser de vindarnena. Êyê ke vera nê hêrişan de bêveng manenê hemkarê dewleta tirke yê.
Ma venga pêro şarê kurdî, cinîyan ê kurdan, hêzanê antî-kapîtalîstan, dostanê xo û azadîgîran danê ke wayîrê Şorişê Rojawanî vejîyê.
Ma venga dadîyanê kurdan, cinîyan ê ciwanan, rêxistinanê cinîyan û pêro cinîyan danê ke veera operasyonanê îşxal û qirkerdişî, vera qirkerdişê cinîyan, vera faşîzmî û hegemonya tewirê tewr xurtî bimojnê. Ma venga cinîyanê Rojhelatê Mîyanênî û dinya zî danê ke hetê kurdan de cabigêrê û hêzê çalakî, rêxistinîye û ferasetî pîlêr bikerê.” BEHDÎNAN
