Hetkarê Hemserekanê DEM Partî yê Berpirsîyarê Komîsyonê Huqûq û Heqanê Merdiman Ozturk Turkdoganî ANFyî rê qisey kerd.
Turkdoganî vist vîrî ke înfazê qanûnî yo ke ê tim rexnê kenê, o zî pêvînayîşê avûkatan û keyeyî tim asteng nêkeno û vat: ”Tîya de yew bêqanûnîye est a. Birêz Abdullah Ocalan serî yew îzolasyono giran est o ke tecrîdî ra wetêr o. Na bêqanûnîye ya. Xora bêqanûnîye Îmrali de dest pêkerd. Nika qerarê mehkemeya qanûnê bingeyî nênî caardene. Eke şima vera bêqanûnîye mevejîyê xora rewşa wina xirabe bena.
Ewro tepişteyî vera tecrîdî grevê vêşanîye de yê. Waştişê wedaritişê tecrîdî waştişêko heqdar o. Xora zîndanan de binpaykerdişê heqan ê bînî zî est ê. Zîndanê Tirkîye tim bi grevanê vêşanîye rojdem de yê. Eslê xo de mesele têna tecrîd nîyo, heme heqê tepişteyan yenê binpaykerdene.”
Turkdoganî bale ante ziwanê şerî yê hukmatî ser û nê vatî: ”Ganî no ziwam bêro caverdayene û ziwanê haştîye bêro qalkerdene. Hukmat wazeno bi sîyasetê pêkewtişî îqtîdar de bimano. Coka Tirkîya kirişta kiştê kaşî. Çimeyê ekonomîkî yê Tirkîya ameyî xerckerdene, krîzêko sîyasî est o. Qanûnê bingeyî yê Tirkîye nêno caardene, Tirkîya vejîyaya teberê huqûqî.
Problemêko pîl est o û çareserkerdişê ci rehet nêyo. Ma sey DEM Partî sîyasetê haştîye rayra benê. Tayî tim kenê ke ma binacê mîyanê pêkewtişan. Dewlete heta ewro semedê çareserkerdişê meseleya kurdan pêro gamî serê Abdullah Ocalanî ra eşt ê. Ma vanê ke tecrîd wedarê û verê prosesê haştîye abikerê.
Piya bi grevê vêşanîye yê zîndanan teber de zî çalakî û aktîvîteyî yenê kerdene. Seke şima zanê dayîkê ma zî nobetanê haştîye tepişene. Ma xora sey partîye paştî danê înan. Seba ke zîndanan de problem meqewimîyo çîyo ke destê ma ra yeno ma kenê. Seba ke tepişteyê sîyasîyî yê ke grevê vêşanîye de yê hetê weşî ra zirar mevînê ma prosesî nêzdî ra teqîp kenê. Ma cehd kenê ke wa grevê vêşanîye meaçarîyo bêdemî. Waştişê wedaritişê tecrîdê serê Birêz Ocalan û embazanê ci babetêkê heqanê merdiman o. Yanî no heqo bingeyî yo. Waştişo sîyasî nîyo. Ganî îqtîdar cade vengê tepişteyan bieşnawo û tecrîdî wedaro ke sey grevêna verênan merg meqewimîyo.” ANQARA
