14ê Kanûna 2015î de Cizîr û Silopî yê qezayê Şirnexî de qedexeyê tebervejîyayîşî ame îlankerdiş û heta 2yê Adara 2016î qedexe dewam kerd. Prosesi de bi seyan kes ameyî qetilkerdiş. 4ê Çeleyê 2016î de Silopî de hîri sîyasetmedarê cinî yê Kurd Sêvê Demîr, Fatma Uyar û Pakîze Nayire ameyî qetilkerdiş.
Cuya Fatma Uyare bi xoverdayîş û têkoşînî derbaz bî û Uyare yew cinîyê xoverdayox ê Kurdistanî bî. Fatmaya ke bi hîrê guleyan ameye qetilkerdiş, vera hêrişê dewlete de qet herra xo nêterikna û hîssê welatperwerî her tim mojnayêne şarê xo.
Fatmaye 27 serrîya xo de ameye qetilkerdiş. Fatmaye 28ê Tebaxa 1988î de dewa Dihokî ya Şirnexî de ameye dinya. 7 way û bira bî. Hema 3 aşmîya xo de tedaya dewlete nas kerd. Bado ke dewa înan yena vengkerdiş keyeyê Fatmaye mecbur maneno ke şêro dewa Mîlga Şantîyê. Di serra ewja de ciwîyenê û dima ra reyya tedaye vera barê Şirnexî kenî.
5 serran tepişte manena
Fatmaye badê 5 serrî yê perwedehî fek mektebe ra verdana. Serra 2000î de tewrê xebata ciwanan bena. 2009î de hema 21 serrî ya xo de yena tepiştiş. 5 serrî tepişte manena. Serra 2014î de serbest yena verdayîş. Dimayê tepiştişê Fatmaye pîyê aye Reşît Uyar yeno tepiştiş û cezaya muebetî ci rê yena birnayîş.
Tewrê têkoşînê cinîyan bena
Fatmaye dimayê tehlîyebîyayîşî xebata cinîyan de ca gêna û cinîyan rêxistin kena. Heta yena qetilkerdiş binê banê KJAye de xebata xo rayîr ra bena. Prosesê qedexeyê tebervejîyayîşî yo ke 14ê Kanûna 2015î de ame îlankerdiş de yew kesê serkêşan rab î. Qetilkerdişê xo ra ver embaza xo ya domanîye Felek Çakare rê vana ‘çîyêk zerrîya mi de est o, sanki ez do şehîd biba.’
Dimayê Fatmaye keye ame hedef girewtiş
Dimayê qetilkerdişê Fatmaye birayê aye rê tehqîqat yeno akerdiş û dadîya aye Hatîce Uyare (50) bi îdîayê endamtîya rêxistine yena tepiştiş. 2 aşm û 10 rojan tepişte manena.
Dadîya Fatmaye, Hatîce Uyare bi wesîleya 8’ine serrgêra qetilkerdişê kênaya xo de ajansê ma re qisey kerd.
‘Girêdayeyê dewaya xo bî’
Uyare da zanayîş ke serran tu çîyêk nêbedilnayo û wina vat: “Her çend ke serr derbaz bibî zî kiştox nêameyî dîyîş û muhakemekerdiş. Ez heta biciwîya ez do wayîrê têkoşînê Fatmaye biveja. Fatmaye cinîyêk ercaye bî, embazêk ercaye bî. Girêdayeyê dewaya xo bî. Rojêke mi aye rê vat ‘kênaya mi ti nêeşkena nê karî bikera’. Aye mi rê vat ‘dayê ti fehm nêkena nê tam karê mi yo’. Fatmaye cinîyêk raşt û zanaye bî. Fatmaye emrê xo yê şenikîye de dest bi xebatan kerd. Kênaya min çend serrî ra dima kewt zîndan. 9 serrî ceza ci rê birnayî. 5 serr û hîri aşman tepişte mend. Her tim raşteyan de bî û xebatan de bî. Wextê qedexeyan Şirnex de bî. Dima ra şîye Sîlopî. Ewja de tewrê di embazê xo şehîd kewt.”
‘Aye tena kênaya mi nê kênaya heme Kurdistanî ya’
Uyare qiseykerdişê xo wina wedênaye: “Ma dadî yî û dejê ma gird o, birînê ma giran o. Heta ez biciwîya ez do taqîpkara dewaya aye biba. Tena taqîpkara dewaya aye nê ez do taqîpkara dewaya hemayan biba. Ma heme dadî yî. Heme zî zerrîya ma de yî. Fatmaye embaza her kesî bî. Xeylê ercaye bî. Aye tena kênaya mi nê kênaya heme Kurdistanî ya. Wa nêra vîrîkerdiş. Wa her kes dest bido yewbînan û na gonîye bido vindarnayîş. Wa dadî hêsirê çiman nêvarnî. Çimanê mi ra hêsir qet nêvindert.” ŞIRNEX
